Bilim salasynyń 270 qyzmetkeri jemqorlyqqa jol bergeni úshin jazalandy - Marat Ahmetjanov
Bul týraly QR Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov elimizdiń joǵary oqý oryndary rektorlarynyń qatysýymen ótken respýblıkalyq keńeste málim etti, dep habarlaıdy QazAqparat tilshisi.
Sybaılas jemqorlyqqa qarsy qyzmet basshysynyń derekterine sáıkes sońǵy úsh jylda bilim berý salasynda 400 - den astam sybaılas jemqorlyq quqyq buzýshylyq tirkelgen. 270 adam qylmystyq jaýapqa tartyldy.
Olardyń arasynda bilim vıtse-mınıstrleri, mınıstrliktiń enshiles uıymdary basqarmalarynyń tóraǵalary, oblys ákimderiniń orynbasarlary, oblystyq jáne aýdandyq deńgeıdegi bilim basqarmalary men bólimderiniń basshylary, JOO rektorlary, mektep dırektorlary jáne taǵy basqalary bar.
«Mysaly, bıyl jazda halyqaralyq aqparattyq tehnologııalar ýnıversıtetiniń burynǵy rektory Damır Shynybekovke (8 jyl) qatysty aıyptaý úkimi kúshine endi, ol JOO býhgalterimen birge stıpendııaǵa bólingen 1,7 mlrd teńgeni urlaǵan», - dedi Marat Ahmetjanov.
Sondaı-aq, ol Qazaq ulttyq qyzdar pedagogıkalyq ýnıversıtetiniń basshylyǵyna jáne memlekettik organdardyń basqa da laýazymdy tulǵalaryna qatysty ýnıversıtettiń jer telimin zańsyz ıelikten shyǵarý faktisi boıynsha is tergelip jatqanyn atap ótti.
Keńes barysynda Marat Ahmetjanov JOO oqytýshylarynyń zańsyz syıaqy alǵany úshin sanktsııany kúsheıtýdi usynady.
Agenttik tóraǵasynyń aıtýynsha, joǵary oqý oryndarynda sybaılas jemqorlyq áreketteriniń eń kóbi Atyraýda - 24%, Nur-Sultan - 20%, Shymkent - 12,5%, Almaty qalasynda - 12%, Almaty oblysynda - 12%, Mańǵystaý-10% jáne Túrkistan-9% oblystarynda jasalǵan.
«Kóbinese beıresmı tólemderdiń 64% - sessııany jabýǵa, 14% - ýnıversıtetke túsýge berilgen. Árbir úshinshi jaǵdaıda JOO qyzmetkerleri, qalǵan jaǵdaılarda deldaldar men úshinshi tulǵalar bastama jasaǵan, 95% jaǵdaıda syıaqy túrinde 5 myńnan 200 myń teńgege deıin aqsha berilgen. Basqa jaǵdaılarda – gúlder nemese táttiler. Saýalnamaǵa qatysqandardyń 28%-y basqa amal joq dep jaýap berse, al árbir besinshi adam bul máseleni sheshý yńǵaıly ári ońaı ekenin aıtqan»- deıdi spıker.
Atalǵan máseleni sheshý úshin Agenttik sybaılas jemqorlyqqa qarsy saıasattyń ázirlenip jatqan tujyrymdamasy aıasynda JOO pedagogteri de kiretin memlekettik emes uıym qyzmetkeriniń zańsyz syıaqy alǵany úshin jaýapkershilikti kózdeıtin QK-niń 247-baby boıynsha sanktsııalardy kúsheıtýdi usyndy. Bul shara osy quramdy qylmystyq teris qylyqtardan ortasha aýyrlyqtaǵy qylmys sanatyna aýystyrýǵa múmkindik beredi.
Keńes sońynda bilim berý uıymdary men Sybaılas jemqorlyqqa qarsy qyzmet arasyndaǵy ózara is-qımylǵa jańa serpin berý, sondaı-aq aldyn alý sapasyn arttyrý maqsatynda Agenttik pen Bilim jáne ǵylym mınıstrligi arasynda birlesken memorandýmǵa qol qoıyldy.
