Bilim salasyndaǵy jemqorlyq Shymkent, ShQO, Túrkistan jáne Qyzylorda oblystarynda órship tur
Jańaqorǵan aýdanynda bilim salasyndaǵy sybaılas jemqorlyqtyń aldyn alý boıynsha keńes ótti.
Oǵan óńirdegi bilim berý uıymdarynyń 1100 basshysy, býhgalterler, memlekettik jáne quqyq qorǵaý organdarynyń ókilderi qatysty.
Mınıstr bilim berý júıesinde qabyldanyp jatqan sharalar men bilim sapasyn arttyrýǵa basa nazar aýdardy.
«Mınıstrliktiń basym mindetteriniń biri - bilim berý uıymdaryn joǵary bilikti kadrlarmen qamtamasyz etý jáne bilim berý júıesindegi menedjmentti jaqsartý. Myqty basshylardy irikteý jáne daıarlaý baǵdarlamasy ázirlenýde. Barlyǵy ashyq ári aıqyn bolý úshin joǵary bilikti pedagogter bazasyn jáne mektep dırektorlarynyń kadrlyq rezervin qurý josparlanýda», - dedi Ǵanı Beısembaev.
Bilim salasyndaǵy sapany qamtamasyz etý komıtetiniń tóraǵasy Ernur Dáýenov bilim berý júıesindegi sybaılas jemqorlyq táýekelderine jáne tsıfrlyq tehnologııalardy qoldana otyryp sheshý joldaryna toqtaldy.
Sondaı-aq qazirgi jaǵdaı týraly Qyzylorda oblysy bilim basqarmasynyń basshysy jáne sybaılas jemqorlyqqa qarsy is-qımyl agenttigi departamenti basshysynyń birinshi orynbasary baıandama jasady.
Sybaılas jemqorlyq faktilerine jol bermeý maqsatynda mınıstrlik aýmaqtyq bólimsheler, Sybaılas jemqorlyqqa qarsy is-qımyl agenttigi, ákimdikter men máslıhattar depýtattary jáne qoǵam ókilderin tarta otyryp monıtorıng toptarynqurýdy usyndy.
Barlyq oblystyq bilim basqarmalary, aýdandyq, qalalyq bilim bólimderin qamtıtyn «bilim aýdıtin» ótkizý josparlanǵan.
Esterińizge sala keteıik, buǵan deıin QR Oqý-aǵartý mınıstrligi men Sybaılas jemqorlyqqa qarsy is qımyl agenttigi elimizdiń barlyq bilim berý uıymdarynda aýdıt júrgizý týraly sheshim qabyldandy.
Birlesken taldaýdyń bastalýyna bilim berý salasyndaǵy túrli sybaılas jemqorlyq qylmystar sebep boldy.
Olardyń basym bóligi Shymkent qalasy, Shyǵys Qazaqstan, Túrkistan jáne Qyzylorda oblystarynda.
Keńes qorytyndysy boıynsha bilim salasyndaǵy qazirgi jaǵdaıdy ózgertý úshin keshendi sharalar qoldaný jóninde sheshim qabyldandy.
Ol - bilim berý uıymdarynda sybaılas jemqorlyq táýekelderine taldaý júrgizý jáne qarjylyq tártipti kúsheıtý.
Aıta ketý kerek, sybaılas jemqorlyqtyń aldyn alý sharalary elimizdiń barlyq óńirlerinde jalǵasady.
