Bilim salasyndaǵy reformalar áli alda - Memleket basshysy
«Bastaýysh, orta nemese joǵary oqý orny bolsyn, bizdiń bilim berý júıesindegi barlyq kemshilikterdi jaqsy bilemiz. Jetken jetistikterimizge toqmeıilsimeımiz. Bilim salasyndaǵy reformalar áli alda. Bizge eń aldymen bilim sapasy men standarttaryn jaqsartý qajet. Bolashaq ýaqyttyń syn-tegeýrinderine daıyn bolýymyz kerek. Tolyqtaı alǵanda, biz bilim men ǵylymǵa ketetin shyǵyndardy jalpy ishki ónimniń 5 paıyzyna deıin jetkizý týraly sheshim qabyldadyq», - dedi Memleket basshysy.
QR Prezıdenti qazirgi kezeńdegi negizgi mindet - kadr daıyndaýdy sapaly jańa deńgeıge kóterý júıesine kóshý ekenin atap ótti. Atalǵan júıe kadrlardy daıyndaý sapasy men eńbek naryǵyndaǵy suranys arasyndaǵy aıyrmany qysqartýy tıis.
«Osyǵan oraı bizge birneshe naqty sharany júzege asyrý qajet. Aldymen kásiptik-tehnıkalyq bilim berý júıesin jańǵyrtý qajet. Negizgi problemalar - kolledjderdiń materıaldyq-tehnıkalyq bazasynyń álsizdigi, túlekterdiń eńbek naryǵy talaptaryna sáıkessizdigi jáne bilikti oqytýshylardyń tapshylyǵy. Bul - biz sheshýge tıis problemalar», - dep atap ótti Q.Toqaev.
Memleket basshysynyń atap ótýinshe, búgingi kúni jumys berýshilerdiń 70 paıyzy kolledj túlekteriniń daǵdylaryna qanaǵattanbaıdy.
«Bul tıisti oqý oryndarynyń bilim sapasy áli kúnge deıin tómen degendi bildiredi. Degenmen, reformalardyń nátıjesinde aıtarlyqtaı nátıjege qol jetkizildi. Alaıda, onymen toqtap qalýǵa múldem bolmaıdy. Ýaqyt jańa ımperatıvti talap etedi», - dedi Q.Toqaev.
