Bilim salasyndaǵy memlekettik satyp alýlar onlaın rejımge aýysýy tıis - Altaı Kólginov
«Bilim salasynda jemqorlyq syn-qater kóp, sondyqtan qolǵa alǵan sharalar óz nátıjesin berýi tıis. Biz ony qadaǵalaımyz. Memlekettik satyp alýlar boıynsha tamaqtaný salasy onlaın rejımge aýysady. Bul máseleni «Astana - adaldyq alańynda» qarastyryp, ortalyq memorgandarǵa usynys jibergen edik. Menińshe, bul ózekti máseleni aıtarlyqtaı retke keltiremiz», - dedi ákim «ANTIKOR» ortalyǵynda ótken onlaın konferentsııada.
Onyń aıtýynsha, bilim salasy boıynsha memlekettik satyp alýlarǵa óte kóp shaǵym túsedi.
«Jeke ózime bir jyl boıy kóptegen shaǵym men ótinishter kelip tústi. Sybaılas jemqorlyqpen kúrestiń mańyzdy bóligi - adamı faktordy azaıtý bolǵandyqtan, oǵan tsıfrlandyrý arqyly qol jetkize alamyz. Barlyq kelisimderdi alyp, barlyq memlekettik satyp alýdy onlaın bastaǵanda, barlyǵy ashyq ári ádil kórinedi, osydan keıin ǵana nátıje týraly aıta alamyz. Tsıfrlandyrý arqyly kóptegen máseleni sheshýge bolady. Munda Sybaılas jemqorlyqqa qarsy qyzmetpen jáne prokýratýramen etene jumys istep jatyrmyz. Biz bilim salasyndaǵy senimdi nyǵaıtqymyz keledi, óıtkeni balalarǵa qatysty salada ońaı oljaǵa jol bermeýimiz kerek. Eń aldymen, balalardyń qaýipsizdigin, tamaq sapasyn jáne ádildikti qamtamasyz etýimiz kerek», - dedi Altaı Kólginov.