Bilim salasynda jemqorlyqtan qalaı qutylamyz - mınıstr Saǵadıevtiń pikiri

ASTANA. QazAqparat - QR Bilim jáne ǵylym mınıstri Erlan Saǵadıevtiń aıtýynsha, aldymen jemqorlyqtyń ekonomıkalyq sebepterimen kúresý kerek, dep habarlaıdy QazAqparat tilshisi.

«Bilimdi halyq úshin barynsha qoljetimdi etsek, jemqorlyq áreketteri de azaıady. Balabaqshalar kóp bolýy tıis. Sol kezde kezekter de bolmaıdy. Mektepter de bilim jaǵynan birdeı bolsa, ata-analar tanys izdep sabylmaıdy. Sosyn bilim salasyna qoǵamnyń ózin tartý qajet. Mysaly, qazir baqylaýshy keńester jaqsy jumys jasap keledi. Bizde joǵary oqý oryndary men balalar úılerinde ondaı tájirıbe sátti iske asyp otyr. Barlyq balalar úıleriniń janynan baqylaýshy keńesteri quryldy. Oǵan balalar quqyqtaryn qorǵaıtyn uıymdar jáne taǵy basqa qoǵam ókilderi kiredi. Qazir jemqorlyqqa qatysty oqıǵalar atalǵan keńesterde qaralady. Osylaısha, qoǵam jemqorlyqtyń azaıýyna óz septigin tıgizedi», - dedi Saǵadıev búgin Úkimette ótken baspasóz máslıhatynda.

Mınıstrdiń sózine qaraǵanda, bilim salasyndaǵy tekseristerdi de barynsha azaıtqan jón. «Mysaly, byltyr biz mektepterdiń attestatsııasyn múldem alyp tastadyq. Óıtkeni onyń eshbir qajeti joq.Qansha teksersek te, mektepterdi jaba almaımyz. Al bilim salasyn baqylaý jónindegi komıtet qaǵalaý organy retinde emes, mektepterdi damytýǵa kómektesetin mekeme bolyp qalyptasýy shart», - dep atap kórsetti Erlan Kenjeǵalıuly.

Aıta keteıik , búgingi baspasóz máslıhatynda mınıstr qazaq tilin bilmeıtin jarty mıllıon oqýshynyń jańa ádispen til úırenetinin jetkizdi.