Bilim salasynda texnokratııalyq kózqaras basym bolyp ketti - saıasattanýshy Ábdiǵalı
Sonyń saldarynan rýxanı qundylyqtar umyt bolyp bara jatyr. Al "Týǵan jer" baǵdarlamasy osy olqylyqtyń ornyn toltyrýy qajet, dep xabarlaıdy QazAqparat tilshisi.
"Týǵan jer" baǵdarlamasy ol tek týǵan jer ǵana emes, bul jerde jalpy qazaq ulty máselesi kóterilip otyr. Búginde ulttyq rýxty texnokratııalyq qundylyqtarǵa elikteý arqyly emes, aýyldyń dástúrli mádenıeti men tarıxymen úılestirý, aýyldan nár alý arqyly jańǵyrtý qajet. Ókinishke qaraı, qazirgi kezde qala men aýyldyń arasynda rýxanı jaǵynan alshaqtyq qatty baıqalady. Sońǵy kezderi saıasatta da texnokratııalyq kózqarastar basym bolyp ketti. Ásirese, gýmanıtarlyq salada, bilim júıesinde reformalardyń kóbisi texnokratııalyq turǵyda júrip jatyr. Al "Týǵan jer" baǵdarlamasy ulttyq sanany jańǵyrtý úshin jasalyp jtqan shara dep senemiz", - dedi Ábdiǵalı búgin efırge shyqqan "1 stýdııa" baǵdarlamasynda.
Onyń aıtýynsha, búginde ólketanýshylyqty damytý, aýyldardy abattandyrý, balalardy el-jerdiń tarıxyn bilýge úıretý, muqtaj azamattarǵa kómektesý jáne taǵy basqa sharalarǵa qatysty jer-jerden usynystar túsip jatyr. Sonyń negizinde "Týǵan jer" baǵdarlamasy daıarlanady.
"Qazirgi jastar ǵalamtor men áleýmettik jelilerdiń qursaýynan shyǵa almaı, aýyldy umytyp bara jatyr. Sondyqtan bul baǵdarlamanyń basty maqsaty - týǵan jerge barsyn, týǵan jerge qyzmet etsin, týǵan jeriniń tarıxyn bilsin. Ony aýyl mektebiniń balalary ǵana emes, sol aýyldan shyqqan barlyq azamattar bilýi kerek. Qalada turatyn úshinshi-tórtinshi býyn jastary aýyldy ákemniń týǵan jeri deıdi de, qoıa salady. Sóıtip, qazaqylyqtan aıyrylady", - dep atap kórsetti saıasattanýshy.
