Bilim oshaqtaryn paıda kózine aınaldyrǵandardy jaýapqa tartý kerek - depýtat
«Aq jol» partııasy ótken jyly Qazaq biliminiń qara shańyraǵy, qoǵamda zańdy rezonans týdyrǵan ál-Farabı atyndaǵy Qazaq ulttyq ýnıversıtetiniń tıesili jer telimderiniń aýmaǵy belgisiz sebeptermen azaıýyna baılanysty Bas prokýror men Bilim mınıstrine saýal joldaǵan bolatyn. Ókinishke qaraı, elimizdiń aımaqtaryndaǵy memlekettik joǵary oqý oryndarynyń jerleri men ǵımarattarynyń da talan-tarajǵa túsip, «tistegenniń aýyzynda, ustaǵannyń qolynda» ketip jatqanyn aqparat quraldarynan estip, bilip jatyrmyz. Mysaly, men ózim oqyǵan Shyǵystaǵy Sársen Amanjolov atyndaǵy ýnıversıtettiń bas ǵımaratynan bes qadam jerde ornalasqan óndiristik sheberhana búginde bilimge eshqandaı qatysy joq karaoke-barǵa aınalǵan», - dedi Berik Dúısenbınov QR Bas prokýrory Berik Asylov pen QR Bilim jáne ǵylym mınıstri Ashat Aımaǵambetovtyń atyna joldaǵan saýalynda.
Onyń aıtýynsha, Bilim jáne ǵylym mınıstrligi óz jaýabynda ýnıversıtettiń (QazUÝ) jer teliminiń 0,779 gektarǵa azaıǵanyn rastaǵan.
«Al Bas Prokýratýranyń saýalymyzǵa bergen jaýabynda 2012 jylǵy 30 qańtardaǵy Almaty qalasy ákiminiń qaýlysyna sáıkes, Ýnıversıtettiń jalpy kólemi 73,26 gektar jer paıdalaný quqyǵyna berilgeni jáne oqý ornynyń jalpy jer kólemi 1,8 gektarǵa azaıǵanyn aıta kelip, tekserýge bastamashylyq etý týraly məseleler prokýratýra organdaryna naqty oqý oryndary tarapynan zańdylyqty buzýshylyqtyń naqty faktileri týraly məlimetter túsken kezde qaralatynyn baıandaǵan edi. Sonda búginge deıin Ýnıversıtetke tıesili jer nege azaıǵany, oǵan kim jaýapty degen suraqqa ókiletti organdardan mardymdy jaýap bolmaı, jumbaq kúıinde qalyp otyr. Mundaı jaǵdaılar tek Ulttyq ýnıversıtetpen ǵana shektelip júrgen joq. Ókinishke qaraı, joǵarǵy oqý oryndarynyń jer telimderiniń jeke menshikke satylyp jatqanyn, stýdent jastar turatyn jataqhanalardyń azaıyp jatqany jasyryn emes», - dedi depýtat.
B. Dúısenbınov joǵarydaǵyny baıandaı kele, myna usynystardy jasady:
– birinshiden, Qazaq ulttyq ýnıversıtetine tıesili jer aýmaǵynan jer ýchaskeleriniń bólinip shyǵarylǵany qanshalyqty zańdy ekenin tekserý;
– ekinshiden, elimizdiń barlyq aımaqtaryndaǵy memlekettik joǵarǵy oqý oryndaryna tıesili jer telimderine arnaıy tekserý júrgizý.
«Úshinshiden, tekserý barysynda zańsyzdyq anyqtalǵan jaǵdaıda, alaıaqtardy, qala ne Ýnıversıtet basshysy bolsyn, jalpy kinálilerdi, bilim oshaqtaryn óz paıda kózine aınaldyrǵan toǵysharlardy esh mansaby men laýazymyna qaramastan, katań jaýapkershilikke tartýdy talap etemiz jáne nátıjesin bizge habarlaýlaryńyzdy suraımyz», - dedi depýtat.
