Bilim ordalaryndaǵy qaýipsizdik: Mektep ınspektorlarynyń shtat sany artady
«Bul – álbette búkil halyq alańdaıtyn másele. Úkimet tarapynan qandaı sharalar qabyldandy? Birinshiden, ózderińiz biletindeı, jýyrda Parlament balalarǵa jasalǵan zorlyq-zombylyqqa qarsy zań qabyldaǵan bolatyn. Ol zań boıynsha mundaı qylmys kezinde taraptardyń tatýlasý quqyǵy alynyp tastaldy. Ekinshiden, bul qylmys asa aýyr sanatqa engizilip, kinálilerdi 14 jyldan ómir baqı túrmege qamaý jazasy belgilendi. Buǵan deıin aıtqanymdaı, ınterneti joq alystaǵy aýyl mektepterinen basqa barlyq mektepke beınebaqylaý kameralaryn ornatamyz. Ekinshiden, septık bar mekteptiń bárine dárethana ornatamyz. Qazirgi tańda mektepterdiń 33 paıyzynyń dárethanalary syrtta. Úshinshiden, mektepterdiń bárine de yqpaldy vedomstvolyq kúzet qoıylady. Biz mektep ınspektorlarynyń shtat sanyn arttyramyz», - dedi Berdibek Saparbaev OKQ-da ótken baspasóz máslıhatynda.
Úkimet basshysynyń orynbasary mekteptiń ishinde dárethana salýda «septık» sózin tekke aıtyp otyrmaǵanyn jetkizdi.
«Mektepterde sý júıesi bolsa, septık jasap, tıisti jumys júrgiziledi. Álbette, alys aýyldaǵy keıbir mektepte dárethana ishte ornatylmaı qalýy múmkin. Biraq, negizi mektepterdiń bárinde bul jumys qolǵa alynady», - dedi ol.
Premer-mınıstrdiń orynbasary bul rette ata-analardyń jaýapkershiligi umytylmaıtynyn jetkizdi.
«Zańda ol da qarastyrylǵan. Sebebi, ata-analar da óz balasyn qaraýsyz qaldyrmaýy kerek», - dedi ol.
Eske sala ketsek, buǵan deıin Úkimet basshysynyń orynbasary 1 qyrkúıekke deıin barlyq mektepke vıdeokamera ornatylatynyn málimdegen bolatyn.