Bilim olımpıadalarynyń jeńimpazdaryn UBT-dan bosatqan durys- T. Balyqbaev
ASTANA. QazAqparat - Búgin Ortalyq kommýnıkatsııalar qyzmetindegi brıfıngte Bilim jáne ǵylym vıtse-mınıstri Tahır Balyqbaev bilim olımpıadalarynyń jeńimpazdaryna qoldaý jasaý kerektigin aıtty.
Tilshiler tarapynan «bilim olımpıadalaryna qatysýshylar UBT-ǵa qatysýy kerek pe?» degen saýal qoıyldy. «Jaqynda ǵana Astanada mektep oqýshylary arasynda fızıkadan Halyqaralyq olımpıada ótip, oǵan 88 elden kelgen jas talanttar qatysty. Solardyń ishinde bizdiń Qazaqstannan qatysqan bes balanyń úsheýi «altyn», al ekeýi «kúmis» medalge qol jetkizdi. Osy oraıda olarǵa arnaıy synaq ótkizýdiń qajeti joq dep, mınıstrliktiń sheshimimen bul oqýshylar zańnama boıynsha UBT-dan bosatylǵan»,-dedi T. Balyqbaev.
Onyń paıymynsha, olımpıada jeńimpazdarynan bolashaqta úlken ǵalymdar shyǵady. «Sol sebepti olımpıada jeńimpazdaryna kómek kórsetip, jaǵdaı jasaımyz desek, olardy Ulttyq biryńǵaı testileýden bosatý mańyzdy. Bul balalar halyqaralyq deńgeıde bilimin dáleldep júr. Bıyl elimizde júz myńnan astam túlek mektep bitirdi. Olardyń ishinde 800-ge jýyǵy túrli olımpıadalardyń júldegerleri, ıaǵnı bul kórsetkish jalpy kólemnen bir paıyzǵa jetpeıdi», - dedi T. Balyqbaev.
Sonymen qatar, ol olımpıadalardyń barlyǵy aýdandyq deńgeıden bastap, respýblıkalyq deńgeıge deıin ótetinin, onyń arnaıy komıssııalary bar ekenin, sondyqtan da olımpıadany joǵary oqý oryndaryna túsýdiń jemqorlyq joly dep aıtýǵa kelmeıtinin atap ótti.
