Bilim mınıstrliginiń ruqsatynsyz bir de bir stýdent Saýd Arabııasynyń ýnıversıtetterine túse almaıdy

Búgin Májiliste QR Din isteri agenttiginiń qyzmetine arnalǵan Úkimet saǵatynda agenttik basshysy Qaırat Lama Sharıf osylaı málim etti.

Jıyn barysynda depýtat Elena Tarasenko sheteldik dinı oqý oryndarynan tálim alyp jatqan qazaqstandyq jastar, olardyń búgingi hám keleshektegi qyzmeti men taǵdyry týraly másele kóterip, saýal qoıǵan bolatyn. Buǵan jaýap bere kele, agenttik basshysy Qaırat Lama Sharıf qyzmetke kirisken sátten bastap, osy máseleni birinshi qolǵa alǵanyn jetkizdi. Onyń aıtýynsha, 2011 jyly sheteldik dinı oqý oryndarynda oqyp jatqan qazaqstandyq azamattar sany 500 shamasynda bolsa, qazir belsendi jumystyń nátıjesinde olardyń 130-y elge oralǵan. Keıbireýi «Nur» Qazaq-Egıpet ıslam ýnıversıtetinde, basqa medreselerde oqýyn jalǵastyrýda.

«Búgingi kúni qazaqstandyq 392 stýdent arab elderinde bilim alyp jatyr. Onyń 200-den astamy Egıpette, 59-y Saýd Arabııasynda, 60-tan astamy Pákistan men basqa elderde júr. Bul baǵytta biz dinı basqarmamen birlese belgili bir baǵytta jumystar júrgizýdemiz», - deıdi agenttik basshysy.

Al sheteldik dinı oqý oryndarynda bilim alǵan stýdentterdiń qyzmetine toqtalǵan Q. Lama Sharıf, olarǵa teologııalyq bilimmen qosa, qazaqstandaǵy dinı jaǵdaıdy uqqan mańyzdy ekenine toqtaldy. «Sondyqtan da, olardy aýdandyq meshitterdiń naıb-ımamy dárejesinen bastap jumysqa qabyldaý oryndy dep otyrmyz. Bul shyn máninde mańyzdy. Óıtkeni, ımam 40-tan asqan, aqyl toqtatqan, eldiń dástúrin tereń biletin azamat bolýy shart. Bul rette shetelde bilim alǵandar elge oralǵanda Qazaqstan úshin qolaısyz bilimderin taratpaǵany lázim», - dedi Q. Lama Sharıf.

Onyń aıtýynsha, jalpy shetel ýnıversıtetterinde dinı oqý máselesine qatysty jumys jan-jaqty júrgizilýde. «Máselen, Bilim jáne ǵylym mınıstrliginiń arnaıy ruqsatynsyz bir de bir stýdent Saýd Arabııasynyń ýnıversıtetterine túse almaıdy. Bundaı jumysty biz Túrkııamen de, basqa eldermen de júrzigip jatyrmyz», - dedi ol.