Bilim mınıstrliginiń olımpıadalary ózgerdi: Pedagogtardyń eńbegin kótermeleý eskeriledi
«Ana-analar men mektepter úshin taǵy bir aqparatty jetkizbekpin. Bilim jáne ǵylym mınıstrliginiń olımpıadalar tizbesin bekitý boıynsha tıisti ózgerister engizildi. Bul óz kezeginde sapalyq ózgeristerge qatysty. Osy jylǵa deıingi olımpıadalardyń tizbesinde 56 olımpıadalyq is-shara qarastyrylǵan bolsa, búgingi kúni bekitilgen tizimde 175 is-sharaǵa deıin keńeıtildi. Ártúrli baǵyttarda daryndylyqty anyqtaıtyn olımpıadalardyń sany ǵana emes, jarystardyń sapalyq sıpattalamalary da ózgerdi», - dedi Sh. Karınova Ortalyq kommýnıkatsııalar qyzmetinde.
Onyń aıtýynsha, endi barlyq olımpıadanyń mekteptik, aýdandyq, qalalyq, oblystyq jáne respýblıkalyq deńgeıleri bolýy shart.
«Bul balalardy yntalandyrý úshin mańyzdy ári pedagogtardyń eńbegin kótermeleý turǵysynan da kerek. Óıtkeni nátıjeler olardyń qyzmetin, biliktiligin baǵalaý kezinde elektrondy túrde muǵalimnen suraýsyz eskeriletin bolady. Ekinshiden, bastaýysh synyp oqýshylary men orta býyn oqýshylary úshin buǵan deıin tizbede eshbir olımpıadalar qarastyrylmaǵan edi. Qazirgi tizbege osy býyndar boıynsha tıisti olımpıadalar negizgi pánder turǵysynan qarastyryldy», - dedi vıtse-mınıstr.
Budan bólek, aýyl oqýshylary úshin zııatkerlik jarystar qarastyrylyp otyr. Olar óte mańyzdy, óıtkeni kóp jaǵdaıda aýyldyq oqýshylar qalalyq gımnazııa, lıtseı oqýshylarymen birge qatysyp, básekelesýge múmkindikteri bolmaı jatady.
Munymen qosa, daryndy balalarǵa arnalǵan mamandandyrylǵan uıymdar úshin zııatkerlik jarystar qarastyryldy.
«Sondaı-aq mektep oqýshylaryna arnalǵan joǵary oqý oryndarynyń olımpıadalary anyqtaldy. Olardyń maqsaty – mamandyqqa tartý, kásipterdi ıgerý úshin tereńdetilgen bilimderdi anyqtaý, kásiptik baǵdarlaý jumysy», - dedi Sholpan Karınova.
«Endi oqý jylynyń basynda barlyq uıym olımpıadalar men konkýrstardy ótkizý týraly erejelerdi, ondaǵy baǵalaý ólshemshartyn, qatysý sharttaryn, ótkizý merzimderin atap, tolyq aqparatty bilim mekemelerine jetkizetin bolady. Barsha jarysqa qatysýshylardyń bazasy jáne olardyń nátıjeleri Ulttyq derekter qory júıesinde elektrondy túrde qoljetimdi bolady. Sonymen birge, jarystar tizbesinde ekologııa, SMART- tehnologııalar máseleleri, konkýrstar men olımpıadalar, zertteý konkýrstary engizildi», - dedi vıtse-mınıstr.
Aıta keteıik , Bilim jáne ǵylym mınıstrligi uıymdastyratyn olımpıadalar oqýshylar úshin aqysyz negizde bolady.
Sonymen qatar qazirgi kezde qazaqstandyq bilim berý naryǵynda jekemenshik kásiporyndar men uıymdar da osy qyzmetterdi aqyly usynyp keledi.
«Biraq Bilim jáne ǵylym mınıstrliginiń bul aqyly jarystarǵa eshqandaı qatysy joq ekenin atap ótemin. Sondyqtan balalar men muǵalimder, mektepter ártúrli olımpıadalar men konkýrstarǵa oqýshylardyń qatysýyn tańdaǵan kezde muqııat bolýyna keńes beremiz», - dedi Sholpan Karınova.
