Bilim mınıstrliginiń ókilderi zorlyq-zombylyq týraly habarlaǵan ata-anamen, balamen kezdesti
AQTÓBE. QazAqparat - Aqtóbede birinshi synyp oqýshysynyń týystary zorlyq-zombylyq týraly málimdegennen keıin Bilim jáne ǵylym mınıstrliginiń ókilderi arnaıy kelip, olarmen kezdesti, dep habarlaıdy QazAqparat tilshisi Bilim jáne ǵylym mınıstrliginiń baspasóz qyzmetine silteme jasap.
QR BǴM Balalardyń quqyqtaryn qorǵaý Komıtetiniń tóraǵasy Esenǵazy Imanǵalıev pen QR Bilim jáne ǵylym mınıstriniń Balalardyń quqyqtaryn qorǵaý máseleleri jónindegi keńesshisi Raısa Sher Aqtóbe oblysyna kelip, zardap shekken balanyń otbasymen kezdesti. Mınıstrlik ókilderi balanyń jaǵdaıymen tanysyp, bala men onyń týystaryna qandaı kómek qajet ekenin surap bildi. B alaǵa jan-jaqty, onyń ishinde psıhologııalyq kómek kórsetiledi.
«Aqtóbe oblystyq bilim basqarmasy Bilim jáne ǵylym mınıstrligine oqýshynyń ata-anasynyń ótinishi týraly ýaqytyly habarlamady. Mektep ákimshiligi qajetti jumysty júrgizbeı, týystarynyń úndeýine tıisti nazar aýdarmaǵan. Ákimdik janyndaǵy barlyq bilim basqarmasy mektepterde ne bolyp jatqanyn baqylaýda ustaýǵa jáne óńirlerde ne bolyp jatqanyn bilýi tıis. Mektepte ár bala úshin yńǵaıly bolatyn jaǵdaı jasaýy kerek. Nemquraılylyqqa jol berilmeıdi», — dedi Balalar quqyǵyn qorǵaý Komıtetiniń tóraǵasy Esenǵazy Imanǵalıev.
Sondaı-aq QR BǴM ókilderi Aqtóbe oblysy ákiminiń orynbasary, oblystyq bilim basqarmasy basshysy, quqyq qorǵaý organdary men qamqorshylyq keńesiniń qatysýymen jıyn ótkizdi. Onda bolǵan oqıǵaǵa baılanysty jaǵdaı tolyq anyqtalǵanǵa deıin mektep dırektory men dırektordyń orynbasaryn qyzmetinen shettetý týraly sheshim jarııa etildi.
Jergilikti atqarýshy organdarǵa kámeletke tolmaǵandarǵa qatysty qaýipsizdik sharalaryn kúsheıtý, osy baǵyttaǵy aldyn alý jumystary jáne bilim berý uıymdaryndaǵy beınebaqylaý kameralarynyń jumysyna muqııat tekserý júrgizý boıynsha tapsyrma berildi. Oblys ákiminiń orynbasary tóraǵalyq etetin Aqtóbe oblysynyń kámeletke tolmaǵandardyń isteri jónindegi komıssııasyna kámeletke tolmaǵandar arasyndaǵy zorlyq-zombylyqqa qarsy kúres boıynsha aldyn alý jumystaryn júrgizý júkteldi.
Aıta keteıik, Aqtóbe oblysynyń bilim salasynda sapany qamtamasyz etý departamenti mektep qyzmetkerlerine qatysty tergeý jumystaryn bastady. Qazirgi ýaqytta atalǵan derek boıynsha tergeý amaldary júrgizilip jatyr.
