Bilim mınıstrliginiń MJÁ boıynsha naqty túsinigi joq – vıtse-premer
NUR-SULTAN. QazAqparat - Úkimet úıinde QR Premer-Mınıstriniń orynbasary Berdibek Saparbaev mınıstrlikterdiń basshylarymen jáne oblystar ákimdikteriniń qatysýymen áleýmettik salada memlekettik-jekeshelik áriptestik jobalaryn iske asyrý boıynsha keńes ótkizdi, dep habarlaıdy QazAqparat primeminister.kz saıtyna silteme jasap.
Vıtse-premer ekonomıka men salany damytý úshin tek bıýdjettik ınvestıtsııalardy tartyp qoımaı, jeke ınvestıtsııalardy jumyldyrý qajet bolǵandyqtan el basshylyǵy memlekettik-jekeshelik áriptestikti damytýǵa erekshe kóńil bólip otyrǵanyn atap ótti.
«2016-2019 jyldary ákimdikter jalpy somasy 61 mlrd teńgege MJÁ jobalaryn iske asyrýǵa 140 shart jasasty. Shyǵys Qazaqstan oblysy jáne Almaty qalasynda birde-bir shart jasalmaǵan. Soltústik Qazaqstan oblysynda, Mańǵystaý oblysynda bir-bir jobadan qol qoıyldy», — dedi ol.
B.Saparbaev onkologııalyq jáne qan aınalym júıesi aýrýlary qyzmetteriniń medıtsınalyq jabdyqtaryn MJÁ boıynsha satyp alýda óńirler artta qalyp qoıǵanyn aıtty.
«Prezıdent Q. Toqaev Úkimettiń keńeıtilgen otyrysynda densaýlyq saqtaý men bilim berý salasynda MJÁ-ni iske asyrý nashar júrgizilip jatqanyn atap ótken bolatyn. Bilim jáne ǵylym mınıstrliginiń MJÁ máseleleri boıynsha naqty túsinigi, paıymy joq, júıeli jumys jolǵa qoıylmaǵan. Qazaqstandyq MJÁ ortalyǵy men BǴM jobalary boıynsha derekterdiń eleýli aıyrmashylyǵy bar», — dedi ol.
Sonymen, vıtse-premerdiń aıtýy boıynsha keıbir óńirler MJÁ-niń kishi túrleri boıynsha belgilengen talaptarǵa sáıkes kelmeıtin jobalardy beredi. Atyraý, Jambyl jáne Batys Qazaqstan oblystarynda bilim berý júıesine ınvestorlardyń qarajaty tartylmaǵan. Aqtóbe, Almaty, Qostanaı, Soltústik Qazaqstan, Qyzylorda oblystary men Nur-Sultan qalasynda Bes áleýmettik bastamanyń sheńberinde jataqhanalardyń qurylysy sozylýda.
Aǵymdaǵy jaǵdaı men qabyldanyp jatqan sharalar týraly densaýlyq saqtaý vıtse-mınıstri Kamaljan Nadyrov, bilim jáne ǵylym vıtse-mınıstri Bıbigúl Asylova, ulttyq ekonomıka vıtse-mınıstri Jasulan Mádıev, Shyǵys Qazaqstan, Aqtóbe oblystary men Shymkent qalasy ákimderiniń orynbasarlary baıandap berdi.
Keńesti qorytyndylaı otyryp, Berdibek Saparbaev birqatar naqty tapsyrmalar berdi. Atap aıtqanda, densaýlyq saqtaý, bilim jáne ǵylym mınıstrlikterine Ulttyq ekonomıka mınıstrligimen, ákimdiktermen birlesip, olardyń naqty tizbesimen jáne aı saıynǵy iske asyrý merzimderimen MJÁ-niń josparlanyp otyrǵan jobalarynyń kestesin qalyptastyrýdy, onlaın rejımde baqylaýdy tapsyrdy.
«Búgin mınıstrlikter ásirese, jergilikti jerde iske asyrylatyn MJÁ jobalarynyń bıýdjettik tıimdiligin taldamaıdy. Biz «sannan - sapaǵa« ótýimiz kerek. Memleket óz betinshe paıda taba alatyn jobalardy basymdyq etýi tıis», — dep naqtylady B. Saparbaev.
Sonymen birge qarajatty paıdalaný jáne qurylystardyń úlgilik jobalaryn paıdalaný tıimdiligine basa nazar aýdardy.
Odan basqa, keńeste áleýmettik saladaǵy obektilerdi jekeshelendirý, olardy senimgerlik basqarýǵa berý jáne baıqaý keńesterin qurý máseleleri qaraldy.
