Bilim mınıstrliginiń qaýlysy ózbek, tájik pen uıǵyrdyń quqyn buza ma?
ASTANA. 27 naýryz. QazAqparat - Bilim mınıstrliginiń qaýlysy ózbek, tájik pen uıǵyrdyń quqyn buza ma? Búgin QR Parlamenti Májilisiniń jalpy otyrysynda depýtat Rozaqul Halmuradov osyndaı másele kóterdi.
Depýtattyń saýal joldaýyna elimizdegi «Dýstlık» atty ózbekterdiń etnomádenı qoǵamdyq birlestikteri qaýymdastyǵynyń haty jáne elimizdegi ózbek, uıǵyr, tájik tilderinde oqytatyn mektepti bitirýshilerdiń bir top ata-analarynyń ótinishi negiz bolǵan.
Bul rette depýtattyń aıtýynsha, búginge deıin óz kúshinde bolǵan QR Bilim jáne ǵylym mınıstriniń «Joǵary bilim berýdiń kásiptik oqý baǵdarlamalaryn iske asyratyn bilim berý uıymdaryna oqýǵa qabyldaýdyń úlgilik erejelerin bekitý týraly» 2007 jylǵy 19 jeltoqsandaǵy № 638 buıryǵy negizinde ózbek, uıǵyr jáne tájik tilderinde oqytatyn mektepterdiń túlekteri mektep bitirýi týraly emtıhandardy ózderi oqyǵan tilde tapsyryp, al JOO-ǵa túsý úshin keshendi testileýge qazaq nemese orys tilderinde qatysatyn edi.
«Sondaı-aq, ózbek, uıǵyr jáne tájik tilderinde oqytatyn mektepti bitirýshi synyptardy kóptildi jáne bıllıngvaldy oqytý úlgisin engizý arqyly qosymsha daıyndaı otyryp, JOO-ǵa túsýge nıettengen barlyq túlekterdi daıyndaýǵa birtindep kóshýge kóńil bóldi. Qazirgi tańda úsh nusqanyń ishinde (tek UBT tapsyrý, tek keshendi testileý nemese olardyń birin tańdaý quqyǵy) ózbek, uıǵyr jáne tájik tilderinde oqytatyn jalpy bilim beretin mektepterdiń bitirýshileri úshin úshinshisi, ıaǵnı daıyndyǵy boıynsha UBT nemese keshendi testiniń bireýin tańdaý quqyǵynyń bolýy qolaıly bolyp tabylady. Ókinishke oraı Qazaqstan Respýblıkasy Úkimetiniń «Joǵary bilim berýdiń kásiptik oqý baǵdarlamalaryn iske asyratyn bilim berý uıymdaryna oqýǵa qabyldaýdyń úlgi qaǵıdalaryn bekitý týraly» 2012 jylǵy 19 qańtardaǵy № 111 Qaýlysy olardy bul quqyǵynan aıyryp otyr. «Dýstlık» qaýymdastyǵynyń paıymynsha, bul jańa «Úlgi qaǵıdalary» ózbek, uıǵyr jáne tájik tilderinde oqytatyn jalpy bilim beretin mektepter bitirýshileriniń orta mektep kýrsynyń qorytyndy (memlekettik) emtıhany túrindegi qorytyndy attestattaýdy ana tilinde tapsyrý quqyǵyn shektep otyr», - deıdi depýtat.
