Bilim mınıstrligine qarasty JOO oqytýshylarynyń jalaqysy 25 paıyzǵa artady

NUR-SULTAN. QazAqparat - Qazaqstanda tıimsiz joǵary oqý oryndaryn ońtaılandyrý jumysy jalǵasady. Bul týraly QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

Pedagogtar men bilim jáne ǵylym salasy qyzmetkerleriniń respýblıkalyq tamyz keńesi barysynda Ashat Aımaǵambetov Bilim jáne ǵylym mınıstrligine qarasty joǵary oqý oryndary oqytýshylarynyń jalaqysyn 1 qyrkúıekten bastap ortasha eseppen 25 paıyzǵa arttyrý josparlanyp otyrǵandyǵyn aıtty.

«Dırektorlar keńesin qurý máselesi de qarastyrylyp jatyr. Onyń quramyna bilim salasyndaǵy top-menedjerler, sarapshylar, jumys berýshiler, memlekettik tapsyrysty bóletin uıymdardyń ókilderi kiredi. Joǵary oqý oryndaryn lıga boıynsha saralaý júrgiziledi. Biz tıimsiz joǵary oqý oryndaryn ońtaılandyrý jumysyn jalǵastyramyz», - dedi mınıstr.

Onyń atap ótýinshe, elimizde joǵary oqý oryndary 4 lıga boıynsha saralanatyn bolady. Birinshi lıgaǵa halyqaralyq deńgeıde básekege qabiletti joǵary oqý oryndary kiredi.

«Mundaı joǵary oqý oryndary 100 paıyz akademııalyq erkindikke ıe bolady. Memlekettik baqylaýdan bosatý olarǵa tekserýge alańdamaýǵa múmkindik beredi», - dedi ol.