Bilim mınıstrligi JOO-larǵa aqyly túrde oqytý baǵasyn retteıtin normany alyp tastaý usyndy
ASTANA. QazAqparat - 4 jyl boıy mamandyqty qarjylandyrýdan bas tartyp, baǵdarlamany ıgerý merzimine tıisti kredıttik tehnologııa boıynsha qarjylandyrýǵa kóshý eskerilip otyr. Bul týraly Parlament Májilisiniń jalpy otyrysynda QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat tilshisi.
Atap aıtqanda, jalpy otyrysta palata depýtattary «QR keıbir zańnamalyq aktilerine joǵary oqý oryndarynyń akademııalyq jáne baqylaý derbestigin keńeıtý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldady.
«Zań jobasynyń maqsaty - «100 naqty qadam» Ult josparynyń jetpis segizinshi qadamyn oryndaý. Onda «Nazarbaev Ýnıversıteti» tájirıbesin eskere otyryp, JOO-lardyń akademııalyq jáne basqarý derbestigin kezeń-kezeń boıynsha keńeıtý kózdelgen. Zań jobasynda bir kodekske, jáne 3 zańǵa ózgerister engizý qarastyrylǵan. Jalpy osy ózgerister JOO qyzmetiniń basty úsh baǵytyn retteıdi: akademııalyq, basqarý jáne qarjy qyzmeti», - dep toqtaldy mınıstr.
Osy oraıda E. Saǵadıev akademııalyq jáne basqarý derbestigi boıynsha ózgeris engizýmen qatar, qarjylandyrý qyzmetin de kúsheıtý qajet ekenin atap ótti.
«Qarjylandyrýdy ózgertý bıýdjettik jáne bıýdjetten tys qarjyny durys paıdalanýǵa jáne materıaldyq-tehnıkalyq, áleýmettik bazamen qamtamasyz etýge jaǵdaı jasaýy tıis. Osyǵan baılanysty, 4 jyl boıy mamandyqty qarjylandyrýdan bas tartyp, baǵdarlamany ıgerý merzimine tıisti kredıttik tehnologııa boıynsha qarjylandyrýǵa kóshý máselesi eskerilgen. Bul turǵyda zań jobasynda mınıstrlikke kredıttik oqytý tehnologııasyn eskerip, JOO-lardy qarjylandyrý tártibin bekitý jáne memlekettik bilim berý tapsyrysyn qalyptastyrý boıynsha jańa quzyret qarastyrylǵan. Sondaı-aq, joǵary jáne joǵary oqý ornynan keıingi kadrlardy daıarlaý úshin memlekettik tapsyrysty bekitý merzimi bir jyldan úsh jylǵa deıin ózgerdi. Osy usynys ekonomıkanyń naqty sektoryn esepke alyp, memlekettik tapsyrysty tıimdi bólýge jaǵdaı jasaıdy», - dedi vedomstvo basshysy.
Sonymen qatar qarjylyq saıasatty reglamentteý aıasynda JOO-larǵa aqyly túrde oqytý baǵasyn retteıtin normany alyp tastaý usynylady.
«Atalǵan ózgeris azamattarǵa, onyń ishinde halyqtyń osal toptaryna jatatyn adamdarǵa joǵary bilim alýǵa qol jetkizýdi keńeıtýge jaǵdaı jasaıdy. Atalǵan ózgerister JOO-larǵa kóptegen erkindikti jáne olardyń basshylarynyń áleýmettik jaýapkershiligin qarastyrady», - dedi ol.
Budan buryn habarlanǵandaı, zań jobasyn tanystyrý barysynda E. Saǵadıev memlekettik jáne ulttyq joǵary oqý oryndaryn memleket 100 paıyz qatysatyn kommertsııalyq emes aktsıonerlik uıymǵa ózgertý máselesi qaralyp otyrǵanyn aıtqan edi.
Munymen qosa, Qazaqstandaǵy joǵary oqý oryndarynyń akademıkalyq derbestigi 65-ten 85 paıyzǵa deıin keńeıtiletini málim boldy.
