Bilim mınıstrligi JOO-lar sekildi mektepterge de jan basyna qarjylandyrýdy engizbek
ASTANA. QazAqparat - Joǵarý oqý oryndary sekildi mektepterde de jan basyna qarjylandyrýdy engizý josparlanady. Búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Bilim jáne ǵylym mınıstri Erlan Saǵadıev osylaı málim etti.
«Memlekettik jáne jekemenshik sektorlardaǵy jaǵdaıdy teńdestirý máselesi barshylyq. Biz JOO-lardaǵy qaǵıdat sekildi mektepterde de jan basyna qarjylandyrýdy engizýdi josparlap otyrmyz. Bundaı ıdeıany engizý jan-jaqty talqylanyp jatyr. Osy máseleni muǵalimdermen, mektep dırektorlarymen, aýdandyq, oblystyq bilim basshylarymen, Qarjy mınıstrliginiń ókilderimen muqııat zertteıtin bolamyz. Pisip, jetilgende taǵy bir tanystyramyz ony. Degenmen, bul júıe negizinen iri qalalarda engiziledi dep josparlanady», -dedi E. Saǵadıev.
Onyń aıtýynsha, jan basyna qarjylandyrýdy aýyldyq mektepterde engizý ázirshe múmkin emes. Bul rette mınıstr mektepterde jan basyna qarjylandyrýdyń ekonomıkalyq qana emes, áleýmettik tıimdiligi de bar ekenin alǵa tartady. Máselen, Máskeý qalasynda úsh jyl buryn osy qaǵıdat engizilip, qazir teńdessiz nátıjege qol jetkizildi.
«Birinshiden, bul jerde bilim berý sapasy birshama artady. Muǵalim mekteptegi eń basty tulǵaǵa aınalady. Óıtkeni, bala mektepten mektepke aýysatyn bolsa, ol ózimen birge qarjysyn da ala ketedi. Sondyqtan da, qaı mektepte bala kóp bolsa, sonda bıýdjet te kóp. Jaqsy mektepte jaqsy muǵalimge suranys artady. Sol arqyly balalar da kóptep keledi. ıAǵnı, muǵalimniń mańyzy ósedi. Ekinshiden, jan basyna qarjylandyrýda mektepke qatysty ákimshilik shyǵyndar birden tómendegen», - dedi E. Saǵadıev.
