Bilim mınıstrligi jetim balalardyń aqshasyn baqylaýǵa kiristi

ASTANA. QazAqparat - QR Bilim jáne ǵylym mınıstrligi balalar úıleriniń bıýdjet jáne qaıyrymdylyq qarajatyn jumsaý sharalaryn qamqorshylyq keńesteri arqyly baqylaýdy qolǵa alyp otyr. Zańnamada bilim berý uıymdarynyń janynan qamqorshylyq keńesterin qurý normasy qarastyrylǵan. Mınıstrlik atalǵan normany iske asyrýǵa kiristi, dep xabarlaıdy QazAqparat tilshisi.

«Búginnen bastap jetim balalarǵa arnalǵan bilim berý mekemeleri janyndaǵy qamqorshylyq keńesteri óz jumysyn bastady deýge bolady. Keńester quramyna úkimettik emes uıymdar, memlekettik organdar, saıası partııalar, bıznes ókilderi, demeýshiler men metsenattar endi», - deıdi bilim jáne ǵylym vıtse-mınıstri Bıbigúl Asylova.

Qamqorshylyq keńesterin qurýdyń negizgi maqsaty - baqylaý sharalaryn kúsheıtý, sondaı-aq jetim balalar tárbıelenip júrgen mekemelerdiń ashyqtyǵyn qamtamasyz etý. Sondaı-aq keńes músheleri san alýan zań buzýshylyqtardy anyqtap, jetim balalardyń jaǵdaıyn jaqsartý jolynda tıisti sharalardy atqarýy tıis. Osy oraıda mınıstrdiń balalar quqyqtaryn qorǵaý boıynsha keńesshisi Bálııa Ákimbekova qamqorshylyq keńes músheleriniń 40 paıyzyn úkimettik emes uıymdar kuraýy qajet dep sanaıdy. Keńestiń tóraǵasy da úkimettik emes uıymnyń ókili bolǵan jón.

Qazirgi kezde bilim jáne ǵylym mınıstrligi qamqorshylyq keńesterin qurý boıynsha tıisti erejelerdi ázirlep qoıdy. Jaqyn arada atalǵan erejelerdi bekitý josparlanyp otyr. Jalpy, zańnamada bilim berý mekemeleri janynan qamqorshylyq keńesterin qurý normasy bar.

Aıta keteıik, búginde respýblıka boıynsha 28 419 jetim bala bar. Olardyń ishinde 21 183 bala qamqorshylyq pen patronattyq tárbıege alynsa, 7 236 ınternatta bilim alyp júr.