Bilim mınıstrligi úıde bilim alatyn 9 myń múgedek balaǵa ınternetke qosylǵan kompıýterlerdi syıǵa tartady
ASTANA. 6 sáýir. QazAqparat /Gúlmıra Álıakparova/ - Qazaqstanda múmkindigi shekteýli balalar jalpy bilim berý mektepterinde oqıtyn bolady, al úıde bilim alatyn árbir múgedek balaǵa Bilim mınıstrligi ınternetke qosylǵan kompıýterdi syıǵa tartpaq.
QR BǴM Mektepke deıingi jáne orta bilim berý departamentiniń dırektory Bahrıden Kárimjanov, búgin ótken baspasóz máslıhatynda atap kórsetkendeı, múmkindigi shekteýli balalarǵa arnalǵan mundaı jaǵdaılar Qazaqstanda Bilim berýdi damytýdyń 2011-2020 jyldarǵa arnalǵan memlekettik barǵdarlamasy aıasynda júzege asyrylatyn bolady.
Onyń sózine qaraǵanda, ınklıýzıvti bilim berý, ıaǵnı damýyndaǵy erekshelikterine qaramastan bilim alýǵa jáne áleýmettik beıimdelýge teń jaǵdaı jasaý - jańa uǵym Bilim berýdi damytýdyń 2011-2020 jyldarǵa arnalǵan memlekettik baǵdarlamasyna engizildi. Baǵdarlamadaǵy bul taraýdy júzege asyrý úshin aldymen zańnamalyq turǵydaǵy kedergiler joıyldy. Odan keıin, qurylys, densaýlyq jáne bilim berý vedomstvolary qoldanystaǵy sanıtarlyq-epıdemıologııalyq erejelerge ózgerister engizdi.
Nátıjesinde, 2015 jylǵa deıin el boıynsha jańadan salynatyn 522 mekteptiń barlyǵynda múgedek balalar kedergisiz bilim alatyndaı jaǵdaılar jasalatyn bolady. Máselen, olarda pandýstar, lıftiler, arnaıy jıhaz ben oqý oryndary jasalady. 2020 jylǵa qaraı mundaı mektepterdiń úlesi 70 paıyzǵa deıin arttyrylady.
Onymen birge, osy kúni úılerinde oqıtyn 9 myń múgedek balanyń 3 myńy bıylǵy jyly-aq qashyqtyqtan bilim alý úshin, ınternetke qosylǵan kompıýterlermen qamtamasyz etiletin bolady. 2011 jyly bul maqsatqa bıýdjetten 1,7 mlrd. teńge jumsalady. Aldaǵy úsh jylda bilim alýdyń zamanaýı múmkindikterimen barlyq balany qamtý kózdelip otyr.
Baǵdarlama aıasynda basty nazar, sondaı-aq balalardyń boılaryndaǵy kemistikterdi erte jasynan anyqtaýǵa baǵyttalady. Al analarǵa psıhologııalyq-pedagogıkalyq kómekter kórsetý úshin búgin jumys istep turǵan 380 kabınettiń sany 2015 jylǵa deıin 540-qa arttylatyn bolady.
Inklıýzıvti bilim berý uǵymynyń taǵy bir baǵyty - qoǵamnyń arasynda túsindirý jumystaryn júrgizý. Ol jumystar jalpy bilim beretin orta mektepterdegi deni saý balalar jáne olardyń ata-analary arasynda júrgiziletin bolady.
Sonymen birge, árbir mektep pen balabaqshaǵa defektolog mamandar shtaty engiziledi. Oqytýshylar men tárbıeshiler kezeń-kezeńimen biliktilikti arttyrý kýrstarynan ótedi.
Departament dırektorynyń aıtýynsha, bul sharalar múmkindigi shekteýli balalardy jalpy mektepte oqýǵa mindettemeıdi. Qazir jumys istep turǵan arnaýly mektepter jumystaryn jalǵastyra beredi jáne olar da zamanaýı jabdyqtarmen jaraqtalatyn bolady. Onymen birge, atalmysh memlekettik baǵdarlama aıasynda Aqmola, Almaty, Batys Qazaqstan, Qyzylorda jáne Soltústik Qazaqstan oblystarynda arnaıylandyrylǵan balabaqshalar salý qarastyrylǵan. Sondaı-aq, respýblıkalyq bıýdjet esebinen Esik jáne Qaraǵandy qalalarynda, jergilikti bıýdjet esebinen Aqtóbe, Mańǵystaý jáne Qostanaı oblystarynda kórý qabileti nashar balalarǵa arnalǵan ınternattar salynady.
Búgingi Qazaqstanda múmkindigi shekteýli balalarǵa arnalǵan 101 arnaýly ınternat bar. Onda 15 myńnan astam bala tárbıelenedi. Jalpy bilim beretin mektepterde, arnaýly bilim berý uıymdarynda, arnaýly synyptarda, kásiptik mektepter men kolledjderde barlyǵy 111 405 múgedek bala oqýmen qamtylǵan.
