Bilim mınıstrligi UBT-nyń alynyp tastalatyny týraly aqparatqa jaýap berdi
ASTANA. QazAqparat - QR Bilim jáne ǵylym mınıstrligi buqaralyq aqparat quraldaryndaǵy jalǵan aqparat taratýdyń úsh jańa faktisin málim etti, dep habarlaıdy QazAqparat tilshisi mekemeniń baspasóz qyzmetine silteme jasap.
Birinshiden, mınıstrliktiń habarlaýynsha, Biryńǵaı ulttyq testileýdi alyp tastaý týraly qańqý sózder qaıta beleń aldy. "Keıbir BAQ (...) balalardyń tehnıkalyq jáne kásibı bilim berý uıymdaryna túsý múmkindigin kóbeıtý úshin, jumysshy mamandyqtaryn alyp shyǵýy úshin UBT sertıfıkatynsyz qabyldaý týraly buıryqty QR BǴM tarapynan túsindirme almastan óz betterinshe tujyrymdap, JOO-ǵa qabyldaý tártibin taratqan. Joǵary oqý ornyna túsý úshin UBT saqtalady. UBT-nyń alynyp tastalýy múmkin degen habardyń esh negizi joq", - dep málimdeıdi mınıstrlik.
Mekemeniń málimdeýinshe, taǵy bir qate túsinik orta bilim berýdegi bala sanyna qaraı qarjylandyrýdy engizýdegi josparly jumysqa baılanysty. Halyq arasynda bıyl memlekettik tapsyrys esebinen jeke mektepterde tegin oryndar paıda bolady degen aqparat tarady.
"Bala sanyna qaraı qarjylandyrý sheshimi jeke mektepterdiń óz qarjylyq talaptaryn qoıýyna yqpal etpeıdi jáne memleket ondaǵy tegin oryndardyń paıda bolýyna kepildik bermeıdi. Sózsiz, bala sanyna qaraı qarjylandyrýdy engizý jeke mektepterdegi oqytý qunyn tómendetedi jáne bolashaqta bos oryn kóbeıip, naryqta usynysqa toly bolsa, "Balapan" baǵdarlamasy sekildi jeke mektepterde tegin oryndar paıda bolýy múmkin. Biraq, aıtylǵan sharalardyń bıyl júzege asaryna kúmánimiz bar", - dep pikir bildirdi mınıstrliktiń baspasóz qyzmeti.
Sondaı-aq, mınıstrlikke grantqa qujat tapsyrǵan ǵalymdardyń ulttyq ǵylymı keńes quramynda bolýǵa quqyqtary bolmaǵany týraly dezınformatsııa jetken.
«Іs júzinde Qazaqstannyń barlyq ǵalymdary ótinim berýdi josparlady, ǵylymı ujymdar bul keńesterdiń quramynda eńbek sińirgen ǵalymdardyń bolýyn talap etti. Alaıda, óz jobasy boıynsha talqylaý/daýys berý sátinde ǵalymǵa talqylaý bólmesinde bolýǵa tyıym salyndy. Sol sebepti alǵash ret ulttyq keńesterdiń otyrystary beınetaspaǵa túsirilip, Memlekettik ǵylymı-tehnıkalyq saraptama ortalyǵynyń saıtyna salyndy", - delingen habarlamada.
