Bilim mınıstrligi: Stýdenttik jataqhana qurylysy jospardan asyra oryndalyp keledi
NUR-SULTAN. QazAqparat – QR Bilim jáne ǵylym vıtse-mınıstri Bıbigúl Asylova stýdenttik jataqhanalardy qurylysyna qatysty túsinik berdi, dep habarlaıdy QazAqparat tilshisi.
«2019 jyldyń qorytyndysy boıynsha berilgen tapsyrmany oryndaý deńgeıi 186 paıyzǵa qamtamasyz etildi. Jospar boıynsha 5 myń oryn tapsyrylý kerek bolsa, jataqhanalarda 9166 jańa oryndy paıdalanýǵa berdik. Elbasynyń Bes áleýmettik bastamasyn júzege asyrý aıasynda 2022 jyldyń sońyna deıin 75 myńnan kem emes orynǵa arnalǵan jańa stýdenttik jataqhana salý tapsyrylǵan edi», - dedi vıtse-mınıstr.
Osy oraıda ol atalǵan bastamany iske asyrý boıynsha arnaýly qurylysty qamtı otyryp, sondaı-aq memlekettik-jekeshelik áriptestikti paıdalaný turǵysynda sharalar kesheni qarastyrylǵanyn eske saldy.
«Atalǵan maqsatty sheshý úshin jataqhana qurylysyn kezeń-kezeńmen júrgizý eskerilgen. Jospar boıynsha 2019 jyly 5 myń orynnan, 2020 jyly 20 myń orynnan, al 2021 jyly 45 myń orynnan kem emes boldy. Osy arqyly 2022 jyly biz osy maqsatty tolyqtaı oryndaýǵa tıistimiz, ıaǵnı 75 myń oryn paıdalanýǵa beriledi. Bastamany júzege asyrý bastalǵaly 34 nysan tapsyryldy, bul óz kezeginde jataqhanalarda 9 166 oryndy qurady», - dep naqtylady B. Asylova.
