Bilim mınıstrligi sırek basylymdardyń saqtalý qaýipsizdigin qamtamasyz etpek

ALMATY. QazAqparat – QR Bilim jáne ǵylym mınıstri Ashat Aımaǵambetov sırek basylymdardyń saqtalý qaýipsizdigi máselesin talqylady, dep habarlaıdy QazAqparat.

Vedomstvo basshysy Almatyǵa jumys sapary barysynda «Ǵylym orda» ortalyǵynda bolyp, Ortalyq ǵylymı kitaphananyń, muraǵattyń, sırek basylymdar qoımasynyń jumysymen tanysty.

«Ortalyqtyń qundylyǵy erekshe, sebebi onda bizdiń ǵylymı jáne mádenı muramyz, otandyq ǵalymdardyń ǵylymı-zertteý jáne aǵartýshylyq jumystary saqtalǵan.

«Almaty tragedııasy» kezinde bolǵan oqıǵalardy eskere otyryp, osyndaı óte qundy qorlardyń saqtalýyn qamtamasyz etý óte ózekti.

Olardy tsıfrlandyrýdy júrgizý, rezervtik kóshirmeler jasaýdy, katalogtandyrýdy, qyzmetkerlerdi oqytýdy, qoljazbalardy jáne basqa da derekkózderdi ǵylymı aınalymǵa engizýdi, ejelgi qujattardy qalpyna keltirýdi qamtamasyz etý qajet. Sondaı-aq ótken oqıǵalar aıasynda olardyń saqtalý qaýipsizdigin qamtamasyz etý de mańyzdy.

Saparymnyń qorytyndysy boıynsha arnaıy ónerkásiptik skanerlerdi, tozǵan qundy kitaptar men ejelgi qoljazbalardy qalpyna keltirýge arnalǵan zerthanalyq jabdyqtardy, saqtaýǵa arnalǵan arnaıy sóreler men jáshikterdi, sondaı-aq qoımalardy qajetti temperatýralyq jaǵdaılarmen qamtamasyz etýge arnalǵan jabdyqtardy satyp alýǵa qarajat bólý týraly sheshim qabyldandy», - dep jazdy mınıstr Facebook-te.

Ashat Aımaǵambetov ǵalymdarmen birge ǵylymı ortalyqtyń jumysyn jańa deńgeıge kóterý máselesin de talqylaǵan.

«Óz tarapymnan, mınıstrlik ǵylymı jumystardy tsıfrlandyrý, bilikti mamandardy tartý, Ulttyq muraǵat qory materıaldarynyń rezervtik kóshirmelerin jasaý jáne jalpy osy ortalyqtyń barlyq ózekti máselelerin sheshýdi baqylaýǵa alatynymyzdy atap ótkim keledi», - dedi Bilim mınıstri.

Eske salaıyq, buǵan deıin Ashat Aımaǵambetov Almatyda bilim berý nysandarynyń ustazdarymen kezdesken bolatyn.