Bilim mınıstrligi muǵalimderdi UBT-ǵa qatysý mindetinen bosatý bastamasyn qoldady
ASTANA. QazAqparat - Aýyl men qala mektepterinde bilim sapasynyń aıyrmashylyǵy saqtalyp otyr. Bul týraly Bilim jáne ǵylym mınıstri Erlan Saǵadıev málim etti, dep habarlaıdy QazAqparat
«UBT nátıjesine qaraǵanda, ótken oqý jylynda qazaq jáne orys mektepteri arasyndaǵy aıyrmashylyq tolyǵymen joıyldy. Biraq aýyl men qalada bilim sapasynyń aıyrmashylyǵy saqtalyp otyr.
Sondyqtan dúnıejúzilik bankpen birlese otyryp, aýyl mektepteriniń materıaldyq tehnıkalyq jaǵdaıyn jaqsartý jáne muǵalimderge arnalǵan kýrstar bıyl bastalady», - dedi vedomstvo basshysy Ortalyq kommýnıkatsııalar qyzmetinde.
Sonymen qatar E. Saǵadıev mınıstrlik óz tarapynan pedagogtar toltyrýǵa tıis qujattardyń tizbesin alǵash ret bekitkenin atap ótti.
Osy oraıda tek 5 qujat eskerilip otyr, odan basqa muǵalimderden eshqandaı esep, eshqandaı qaǵaz suralmaýy tıis.
«Jańa oqý jylynan bastap UBT-ǵa qatysý mindetinen muǵalimderdi bosatý talqylanýda. Mınıstrlik bul bastamany qoldaıdy. Muǵalim tek sapaly bilim berýmen aınalysýy kerek. Mektepterdiń UBT boıynsha reıtıngin de alyp tastadyq. Barlyqtaryńyz bilesizder, jańartylǵan bilim berý mazmuny boıynsha sabaq beretin 205 myń (67%) muǵalimniń jalaqysy 30 paıyzǵa kóbeıdi. Bıyl pedagogtardy attestattaýdyń jańa júıesi engizildi. Ol biliktilik sanattary úshin laýazymdyq jalaqyǵa 30-dan 50 paıyzǵa deıin qosymsha ústemaqyny qarastyrady», - dedi mınıstr.
Onyń sózine qaraǵanda, attestattaýǵa mamyr aıynda 60 myńǵa jýyq muǵalim qatysyp, olardyń ishinen 36 myńnan astamy attestatsııadan ótti. Osy jyldyń qyrkúıek aıynan bastap jańa attestatsııa tártibinen ótken muǵalimderge kategorııalaryna sáıkes qosymsha aqy tólenedi.
«Sonymen birge aǵymdaǵy jyly 110 myńnan astam pedagog respýblıkalyq bıýdjet esebinen biliktilikti arttyrý kýrstarynan ótýde. 8 myńnan astam pán muǵalimderi jeke pánderdi aǵylshyn tilinde oqytý úshin tildik kýrstarda oqýda. Olardyń 5 myńǵa jýyǵy osy oqý jylynan bastap sabaq berýge kirisedi.
«Ustaz» ortalyǵy barlyq óńirlerde aǵylshyn tilinde sabaq bere bastaıtyn tórt jarym myńnan astam muǵalim úshin mentorlyq arqyly qoldaý jasaıdy. Bir jyl boıy bul muǵalimderdi tolyǵymen qoldap, úıretip, sabaqtaryna qatysyp, naqty kómek kórsetiletin bolady», - dep túıdi E. Saǵadıev.
