Bilim mınıstrligi kórkem ádebıet balalarǵa qoljetimdi bolýy úshin arnaıy joba ázirledi
«Bilim jáne ǵylym salasyna qarasty 7096 kitaphana jumys isteıdi. Mektepterde – 6461, kolledjderde – 579, joǵary oqý oryndarynda – 56, sondaı-aq Respýblıkalyq ǵylymı-pedagogıkalyq kitaphana qyzmet etýde. Al bilim berý uıymdaryndaǵy jalpy kitap qory – 267 325 289. Sany, árıne, kóńil kónshiterlik. Degenmen olardyń qanshasy kórkem ádebıet? Sol kórkem ádebıettiń qanshasy qazaq tilinde? Mektep kitaphanalary jańa kitaptarmen qanshalyqty jıi tolyqtyrylady? E. Berroýz, A. Azımov, M. Tven, J. Vern jáne basqa avtorlardyń eńbekteri qazaq tiline aýdarylǵan ba? Bul turǵyda aıtarlyqtaı problemalar bar», - dep jazdy mınıstr áleýmettik jelidegi paraqshasynda.
Onyń aıtýynsha, kitaphana qory negizinen oqýlyqtardan turady, al kórkem ádebıet sany az. Olardyń basym bóligi keńestik kezeńde paıdalanylǵan ıdeologııalyq sıpattaǵy kitaptar.
«Ásirese qazaq tilinde jazylǵan qazirgi zamanǵy kórkem ádebıet – joqtyń qasy. Kórkem ádebıettiń balalarǵa qoljetimdi bolýy úshin mınıstrlik arnaıy joba ázirledi. Joba aıasynda bilim berý uıymdaryna qarasty kitaphanalardyń materıaldyq-tehnıkalyq jáne aqparattyq bazasyn jaqsartý, balalarǵa arnalǵan kórkem ádebıetti jyl saıyn satyp alýdy júzege asyrý boıynsha sharalar qabyldanatyn bolady. Sondaı-aq Ulttyq bilim akademııasy ádebıet, til ınstıtýttarymen, «Oqýlyq» ortalyǵymen, Ulttyq ǵylymı kitaphanamen, NZM, BIL birlesip usynylǵan ádebıetter tizimin qurýǵa kiristi. Joba aıasynda qazaq ádebıetiniń de, qazaq tilindegi álem ádebıetiniń de qoljetimdi bolýyna erekshe nazar aýdaramyz. Odan ózge kitaphanalardy ǵylymı fantastıka janryndaǵy kitaptarmen qamtamasyz etý de mańyzdy», - dedi Ashat Aımaǵambetov.
