Bilim mınıstrligi kolledjderde maman daıarlaýdyń problemalaryn atady
NUR-SULTAN. QazAqparat – QR Bilim jáne ǵylym vıtse-mınıstri Bıbigúl Asylova tehnıkalyq jáne kásiptik bilim berý júıesindegi negizgi problemalardy atady, dep habarlaıdy QazAqparat tilshisi.
«Biz tehnıkalyq jáne kásiptik bilim berý júıesindegi negizgi syn-qaterdi aıqyndadyq. Bul rette tehnıkalyq jáne kásiptik bilim berýdiń tartymsyzdyǵy, kadrlar daıarlyǵynda eńbek naryǵyn qanaǵattandyrmaý, memlekettik tapsyrystyń tıimsiz ornalasýy, dýaldy oqytýǵa óndiristiń qyzyǵýshylyq tanytpaýy, bilim berý memstandartyn qatań reglamentteý, materıaldyq-tehnıkalyq bazanyń nashar qamtylýy, pedagogıkalyq kadrlardyń qartaıýy, mamandyqtar boıynsha jumysqa turý deńgeıiniń tómendegi, kolledj qyzmetin syrtqy baǵalaýdyń joqtyǵy baıqalyp otyr», - dedi vıtse-mınıstr Májilisitiń Áleýmettik-mádenı damý komıtetiniń keńeıtilgen otyrysynda.
Osy oraıda ol qazirgi kezde tehnıkalyq jáne kásiptik bilim boıynsha kadrlardy daıarlaýǵa memlekettik tapsyrysty jergilikti atqarýshy organdar ornalastyratynyn, bul turǵyda óńirdegi eńbek naryǵyndaǵy qajettilikter eskeriletinin túsindirdi.
«Alaıda óńirlerde qajettilik eńbek naryǵyndaǵy aǵymdaǵy bos oryndar negizinde qalyptasqandyqtan, memlekettik tapsyrys kóbine kolledjder ótinimine negizdelip keledi. Kadrlar boıynsha óńirlerdiń orta ári uzaq merzimdegi ekonomıka boljamy turǵysynda óńirlik deńgeıdegi júıelik problema kadrlar daıarlyǵy men eńbek naryǵy qajettiginiń teńgerimsizdigine alyp keledi. Máselen, qurylysta qajettik ortasha eseppen 25,8 myń adamdy qurasa, al oqyp jatqandar sany – 6,2 myń. Al aqparat jáne baılanys baǵytynda 20,7 myń adam kerek bolsa, bilim alyp jatqandar 8,1 myń adamǵa jetken», - dedi B. Asylova.
