Bilim mınıstrligi kadr daıyndaýǵa qosymsha 21 mlrd teńge surap otyr

ASTANA. QazAqparat - Aldaǵy úsh jylda kolledjderde kadr daıyndaý úshin qosymsha 21 mlrd teńge qajet. Bul týraly búgin Úkimet otyrysynda «Nátıjeli jumyspen qamtý jáne jappaı kásipkerlikti damytý baǵdarlamasy» týraly baıandaǵan Bilim jáne ǵylym vıtse-mınıstri Bıbigúl Asylova aıtty, dep habarlaıdy QazAqparat tilshisi. 

«Birinshi, Qyzylorda oblysynda baǵdarlama aıasynda 1515 adamdy kolledjde oqytý kózdelgen. Biraq, ákimdik 500 adamǵa memlekettik tapsyrys bólgen. Ákimdik málimeti boıynsha, Eńbek mınıstrligi respýblıkalyq bıýdjetten tolyq kólemde qarjy bólmeı, másele týyndap otyr», - dedi ol baǵdarlamany júzege asyrýdaǵy túıtkilderge toqtala kele.

Ekinshiden, onyń sózine qaraǵanda, kelesi oqý jylynda kadrlardy oqytý boıynsha qosymsha qajettilik bar. 10 oblys ákimdikterimen 8829 adamǵa qosymsha qajettilik rastaldy. 7 óńirdiń málimeti boıynsha, kadrlarǵa ondaı qajettilik joq.

«Jalpy, úsh jylǵa qajettilik 21 mlrd teńgeni quraıdy. Eger qoldaý tapsa, mınıstrlik tıisti bıýdjettik ótinimdi jasaıdy», - dedi vıtse-mınıstr.