Bilim mınıstrligi «Daryn» syılyǵyn zań arqyly bekitýdi usyndy
ASTANA. 12 naýryz. QazAqparat - «Daryn» Memlekettik jastar syılyǵyn zań arqyly bekitý kózdelip otyr.
Bul týraly búgin QR Parlamenti Májilisinde «Qazaqstan Respýblıkasynyń keıbir zańnamalyq aktilerine memlekettik jastar saıasaty máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.
Zań jobasy boıynsha baıandaǵan Bilim jáne ǵylym mınıstriniń orynbasary Mahmetǵalı Sarybekovtyń aıtýynsha, jastar saıasatyn qoldaýǵa arnalǵan qoldanystaǵy zań 2004 jyly qabyldanǵan. Bul qujat jalpylama ári shekteýli sıpatty qamtyǵany belgili.
«Al jańa zań jobasynda biz memlekettik organdardyń jastar saıasatyndaǵy quzyretin naqtylap qana qoımaı, jastardy áleýmettik turǵydan qoldaý boıynsha naqty sharalardy zań júzinde bekitýdi maqsat tutyp otyrmyz. Osy rette «Memlekettik jastar saıasaty týraly» qoldanystaǵy zańǵa 17 ustanym, «Bilim týraly» zańǵa 1 ustanym boıynsha ózgerister engiziletin bolady», - deıdi mınıstrdiń orynbasary.
Onyń sózine qaraǵanda, zań jobasy boıynsha jastar saıasatyn sapaly iske asyrý úshin alǵash ret elimizdiń barlyq aımaqtarynda jastar saıasaty jónindegi ýákiletti organdar qurý usynylady. Bundaı basqarma qazirgi tańda tek Almaty qalasynda ǵana bar kórinedi. Ondaı organdar jastar bastamalaryn qoldap, júzege asyrýǵa járdemdesedi.
«Budan bólek birinshi ret jeke bap engizý arqyly «Daryn» Memlekettik jastar syılyǵyn zańnamalyq deńgeıde bekitýdi usynyp otyrmyz. Osylaısha biz jastar syılyǵynyń mártebesin kúsheıtip, onyń zańnamalyq deńgeıin qamtyǵymyz keledi», - deıdi M. Sarybekov.
