Bilim mınıstrligi bıyl 20-dan astam jekemenshik JOO-ny biriktiredi
ASTANA. 13 shilde. QazAqparat - Aǵymdaǵy jyly elimizdiń 20-dan astam jekemenshik joǵary oqý orny biriktiriletin bolady.
Bul týraly búgin Úkimet otyrysynda QR Bilim jáne ǵylym mınıstri Baqytjan Jumaǵulov málim etti.
«Aǵymdaǵy jyly Qazaqstanda jekemenshik 20 joǵary oqý orny, al kelesi jyly taǵy da 10-y biriktiriletin bolady», -dep atap ótken mınıstrdiń sózine qaraǵanda, JOO-lardy ońtaılandyrý jumystary qazirdiń ózinde bastalyp ta ketken. Bul rettegi mınıstrliktiń basty mindeti jekemenshik joǵary oqý oryndaryn biriktirý arqyly bilim oshaqtaryn úlkeıtip, olardyń bazasynda áleýeti joǵary básekege qabiletti uıym qurý bolyp otyr.
«Memleket basshysynyń tapsyrmasyna sáıkes qazirdiń ózinde bilim berýdi jańartý negizgi úsh baǵytta, atap aıtqanda, bilim berý mekemelerin ońtaılandyrý, oqý-tárbıe berý úderisin jańartý, bilim berý qyzmetteriniń tıimdiligi men qoljetimdiligin arttyrý boıynsha bastalyp ketti», - dedi B.Jumaǵulov.
