Bilim mınıstrligi balalardy bir kúndi ınternetsiz ótkizýge shaqyrady
«Búgingi tańda balalardyń smartfonnan nemese planshetten alshaqtaýyna kelisim bermeýi ár ata-anaǵa tanys jaǵdaı. «Taǵy da 5 mınýt, sosyn boldy», «Men jańa ǵana aldym ǵoı» sııaqty sózder kúndelikti qalypty qubylysqa aınaldy. Dúnıejúzilik statıstıka boıynsha, halyqtyń shamamen 50 paıyzy qandaı da bir áleýmettik jelide, al keıbireýleri tipti birden barlyq áleýmettik jelilerge tirkelgen», - delingen mınıstrliktiń baspasóz habarlamasynda.
Internetke táýeldiliktiń aldyn alý, kámeletke tolmaǵandardyń ınternettegi belsendiligin baqylaý, eresek ınternet-qyzmetterdi paıdalanýshylardyń jaýapkershiligin, ınternet paıdalaný mádenıetin arttyrý maqsatynda Qazaqstan Respýblıkasy Bilim jáne ǵylym mınıstrligi 2019 jylǵy 27 qańtar - Halyqaralyq ınternetsiz kúnine oraı «Men OFFLINE» respýblıkalyq keń aýqymdy balalar aktsııasyn ótkizedi.
«Atalǵan is-shara oqýshylardy smartfonnan, kompıýterden jáne jahandyq jeliden alshaqtatý, bul kúndi tek qana shynaıy álemde ómir súrýge, jaqyn adamdarmen qarym-qatynas jasaýǵa nemese ony súıikti hobbıine arnaýǵa kómektesedi», - dep habarlaıdy mınıstrlikten.
Aktsııamen respýblıkadaǵy barlyq 1-11 synyp oqýshylaryn qamtý josparlanyp otyr. Oblystardyń, Astana, Almaty jáne Shymkent qalalarynyń bilim basqarmalary 1-4 synyptarǵa arnalǵan «Internetsiz kúndi qalaı ótkizdim» atty sýret baıqaýyn, 5-11 synyp oqýshylaryna arnalǵan «Men OFFLINE» esse baıqaýyn uıymdastyrady. Jumystar Qazaqstan Respýblıkasy Bilim jáne ǵylym mınıstrligi Balalardyń quqyqtaryn qorǵaý komıtetiniń Facebook-tegi resmı paraqshasynda jarııalanady.
