Bilim mınıstrligi B.Saparbaevtyń synyna ushyraǵan oqý oryndaryn atady
ASTANA. QazAqparat - QR Bilim jáne ǵylym mınıstrligi QR Premer-Mınıstriniń orynbasary Berdibek Saparbaevtyń synyna ushyraǵan joǵary oqý oryndaryn atady. Vedomstvonyń «QazAqparat» HAA tilshisiniń resmı saýalyna oraı bergen jaýabynda atalǵan joǵary oqý oryndarynyń ishinde Qazaq ınjenerlik-tehnıkalyq akademııasy bar ekendigi aıtylǵan.
Esterińizge sala keteıik, Bilim jáne ǵylym mınıstrliginiń keńeıtilgen alqa májilisinde B.Saparbaev stýdentter bilimine salǵyrt qaraǵan JOO-lar jabylatyndyǵyn qatań eskertken edi.
«Jekemenshik joǵary oqý oryndaryna qatysty toqtalatyn bolsam, mınıstrmen birge Astanada eki JOO-ǵa baryp, olardyń jaǵdaıymen tanystyq. Aıtýǵa uıat, stýdentter men baza joq, biraq mamandar daıarlap jatyrmyz dep málimdeýde. Bul ne ózi? Balalardan uıalýymyz kerek qoı, erteń olar qandaı maman bolady jáne qalaı jumys isteıdi? Sondyqtan bul turǵyda qatań tártip bolatyndyǵy jaıynda jekemenshik jáne memlekettik joǵary oqý oryndary men kolledjderdiń basshylaryn eskertemin. QR BǴM komıtetine tıisti tapsyrma berildi», - dedi B.Saparbaev.
Osy oraıda ol talapqa sáıkes kelmeıtin oqý oryndary jabylatyndyǵyn qadap aıtty.
«Bul turǵyda ary qaraı tıisti sharalardy qabyldaımyz. Bas prokýratýramen birlese tekserip, talapqa saı kelmeıtinderin jabamyz. Sondyqtan lıtsenzııa talaptary bar jáne osy talaptardy oryndańyzdar», - dedi B.Saparbaev.
