Bilim mınıstrligi ata-analarǵa granttardyń úlestirilý protsesin kórsetti
ASTANA. QazAqparat - Joǵary bilim júıesinde bıylǵy oqý jylynda tereń ózgerister bolmaıdy. Bul týraly Úkimet otyrysynan keıingi brıfıngte QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat.
«Altyn belgi» máselesi boıynsha respýblıkalyq komıssııa jan-jaqty qarastyryp, qosymsha granttar bólip, durys sheshimge keldi dep esepteımin. Bıyl komıssııanyń jumysyna ata-analardyń ókilderi qatysty jáne olar grant bólý úderisiniń ashyqtyǵyn ózderi kórdi», - dep atap ótti E. Saǵadıev.
Onyń sózine qaraǵanda, bıylǵy oqý jylynda tereń ózgerister bolmaıdy.
«Bilim salasyndaǵy eń mańyzdy sheshimder byltyr qabyldanyp, aǵymdaǵy jyly sol jumystardy ary qaraı jalǵastyramyz», - dedi mınıstr.
Budan buryn habarlanǵandaı, «Altyn belgi» ıegerleri úshin qosymsha granttar bólindi.
«Qoldanystaǵy zań boıynsha «Altyn belgi» ıegerleri artyqshylyq quqyǵyna sáıkes granttarmen qamtylýy kerek. Sol sebepti respýblıkalyq komıssııa atalǵan sanattaǵy abıtýrıentterge ýnıversıtterdiń, QR BǴM men Densaýlyq saqtaý mınıstrliginiń qarjysy esebinen grant bólý týraly sheshim shyǵardy. Granttardyń sany 4 protsentke, ıaǵnı 1487-ge kóbeıdi», - deıdi QR BǴM Joǵary jáne joǵary oqý ornynan keıingi bilim departamentiniń dırektory Gúlzat Kóbenova.
