Bilim mınıstrligi «Astana» ýnıversıtetin sotqa berdi
NUR-SULTAN. QazAqparat - «Astana» ýnıversıteti QR Bilim jáne ǵylym mınıstrliginiń tekserý jumystaryna kedergi keltirip, qajetti qujattardy usynbaǵan. Bul jaıynda mınıstrliktiń baspasóz qyzmetinen málim etti, habarlaıdy QazAqparat tilshisi.
Vedomstvo aqparatyna qaraǵanda, laýazymdy tulǵalarǵa memlekettik baqylaý júrgizý kezinde kedergi jasaý faktisi boıynsha Qazaqstan Respýblıkasy «Ákimshilik quqyq buzýshylyq týraly» Kodeksi 462-babynyń 1-tarmaǵyna sáıkes ákimshilik quqyq buzýshylyq týraly hattama toltyryldy. Qazirgi ýaqytta tıisti materıaldar sottyń qaraýyna jiberildi.
Esterińizge sala ketsek, 2019 jyly júrgizilgen tekserý nátıjesinde «Astana» ýnıversıtetiniń bilim berý jumystarynda táýekeldiń joǵary ekendigi anyqtalǵan. Osyǵan baılanysty ýnıversıtet 2020 jyldyń birinshi jartyjyldyǵynda profılaktıkalyq baqylaýǵa jatatyn bilim berý uıymdarynyń tizimine engizilgen.
«2020 jyldyń 12 aqpanynda QR BǴM tarapynan ýnıversıtetke profılaktıkalyq baqylaý júrgiziletindigi týraly habarlama jiberildi. Kelesi kúni tıisti akt QR Bas prokýratýrasynyń Quqyqtyq statıstıka jáne arnaıy esepke alý jónindegi komıtetinde tirkeldi. 17 aqpanda ýnıversıtet komıssııaǵa joǵary oqý ornyna kedergisiz kirýdi qamtamasyz etip, baqylaý nysanyna sáıkes qajetti qujattardy nemese olardyń kóshirmelerin usynýǵa mindetti boldy. Alaıda, «Astana» ýnıversıteti Qazaqstan Respýblıkasy Kásipkerlik kodeksiniń 155-babynyń 2-tarmaǵynyń 1) jáne 2) tarmaqshalaryn buzyp, komıssııaǵa tıisti qujattardy usynbady», - dep atap ótedi mınıstrlikten.
Buǵan deıin QR Bilim jáne ǵylym mınıstrligi «Astana» ýnıversıtetinde birqatar buzýshylyqty anyqtaǵanyn jazǵan edik.
Vedomstvo dereginshe, ýnıversıtetke qabyldaý erejeleri, stýdentterdi aýystyrý jáne qaıta qabyldaý tártibi, emtıhan ótkizý jáne emtıhan sessııasynyń qorytyndysy boıynsha qujattar júrgizý tártibi buzylǵan. Sonymen qatar, aralyq baqylaý júrgizý kezinde Akademııalyq saıasat saqtalmaǵan.
