Bilim mınıstrligi alty bala pyshaqtalǵan jappaı tóbeleske baılanysty shuǵyl sharalar qabyldady
ASTANA. QazAqparat - Qyrǵyzstannyń Bilim jáne ǵylym mınıstrligi Olımpıada qory respýblıkalyq ýchılışesi men № 38 mektep oqýshylarynyń arasynda alty balanyń pyshaq jaraqatymen aýrýhanaǵa túsýine sebep bolǵan tóbeleske baılanysty birqatar shuǵyl sharalar qabyldady.
Bul týraly búgin vedomstvoǵa silteme jasaǵan KırTAG habarlady.
Mınıstrlik sondaı-aq 17 qyrkúıekte QR Úkimetinde Bishkek qalasy ákimshiligi, ІІM jáne QІІB, Bilim jáne ǵylym mınıstrligi, Densaýlyqty saqtaý mınıstrligi, memlekettik dene shynyqtyrý jáne sport agenttiginiń basshylyǵy, el astanasyndaǵy eki mektep dırektorynyń qatysýymen oqýshylar arasyndaǵy jappaı tóbeles oqıǵasy talqylanǵan shuǵyl otyrys ótkizilgendigin málim etti.
Eske sala keteıik, oqýshylar arasyndaǵy jappaı tóbeles 16 qyrkúıekte saǵat 21:30 shamasynda oryn alǵan. Sonyń saldarynan pyshaq jaraqattaryn alǵan 6 bala aýrýhanaǵa jetkizilgen. Pyshaq ıesi bolýy múmkin kúdiktilerdiń biri ustaldy. Tergeý amaldary júrgizilip jatyr.
