Bilim mınıstrligi: 2016 jylǵy UBT-nyń ortasha bally - 81,2
ASTANA. QazAqparat - 2016 jylǵy UBT-nyń ortasha kórsetkishi - 81,2 balldy qurap otyr. Bul týraly búgin QR BǴM bilim jáne ǵylym salasyndaǵy baqylaý komıteti tóraǵasynyń orynbasary Lázzat Bólebaeva aıtty.
«13 jyl ishinde UBT-ǵa 1 mıllıon 587 myń mektep bitirýshi qatysty. Bıylǵy UBT 165 pýnktte ótti. Aǵymdaǵy jylǵy 121 myń bitirýshiniń ishinde UBT-ǵa qatysýǵa 87 myń túlek ótinish bergen. Onyń ishinde qazaq tilinde - 83 330, 23 984 bala - orys tilinde oqyǵandar. Testileýge 84 079 mektep bitirýshi qatysty. Birneshe ret tártip buzǵan 38 túlek testileýden shyǵaryldy jáne nátıjeleri joıyldy. Testileý barysynda shekti 50 balldy 14 252 túlek jınaı almady. 52 982 baladan tyıym salynǵan zattar tabyldy. Jalpy UBT uıymdasqan deńgeıde ótti. Bıylǵy ortasha ball - 81,2 ball. 2015 jyly 79,4 ball bolǵan edi», - dep atap ótti ol búgin Ortalyq kommýnıkatsııalar qyzmetinde ótken brıfıngte.
Onyń málimetteri boıynsha, eń joǵary 125 balldy bıyl 19 bala jınady. 2015 jyly 5 mektep túlegi ǵana jınaǵan bolatyn. 100 balldan astam jınaǵan balalar sany - 16 565.
«Respýblıkalyq appelıatsııalyq komıssııaǵa test tapsyrmalarynyń mazmuny boıynsha 547 ótinish kelip tústi. Onyń ishinde 141-i qanaǵattandyryldy. Aǵymdaǵy jyly shekti deńgeıden óte almaǵan túlekter JOO-nyń aqyly bólimine túsý úshin, qaıta keshendi testileýden ótýge quqyly. Atalǵan testileý túrine qatysý úshin ótinishterdi qabyldaýdy JOO qabyldaý komıssııalary 1-i men 8 tamyz aralyǵynda júzege asyrady. Testileý 19 - 24 tamyz aralyǵynda ótkiziledi», - dep túıdi sózin komıtet tóraǵasynyń orynbasary.
