Bilim mınıstrligi 2015 jylǵa qaraı barlyq mektepterdi oqýlyqpen tolyq qamtýdy josparlaıdy
ASTANA. QazAqparat - 2015 jyly memlekettik qarajat esebinen mektepterdi oqýlyqtarmen jáne oqý-ádistemelik keshendermen tolyqtaı qamtamasyz etý josparlanady. Parlament Májilisinde «Oqýshylardy oqýlyqtarmen jáne oqý-ádistemelik keshendermen qamtamasyz etý problemalary men sheshimderi» taqyrybynda ótken Úkimet saǵatynda Bilim jáne ǵylym mınıstri Aslan Sárinjipov osylaı málim etti.
Mınıstrdiń aıtýynsha, oqýlyqtarmen tolyq qamtamasyz etý protsesi kezeń kezeńimen júzege asatyn bolady. «Oqýlyqtardy qaıta basyp shyǵarýdyń tórt jyldyq tsıklyna baılanysty, qazirgi tańda bul oqýlyqtardy satyp alý arqyly iske asady. Mektep kitaphanalarynyń kitap qory oqý pánderiniń sanyna, synyptaǵy oqýshylar sanyna baılanysty qalyptasady. Búgingi tańda Astana jáne Almaty qalalary, Jambyl, Mańǵystaý, Atyraý, Batys Qazaqstan jáne Pavlodar oblystary oqýlyqpen tolyq qamtamasyz etilgen. Basqa óńirlerde, máselen Soltústik Qazaqstan, Almaty, Qostanaı, Aqmola oblystarynda áli de máseleler bar», deıdi A. Sárinjipov.
Onyń aıtýynsha, oqýlyqtardy tegin qamtamasyz etý respýblıka boıynsha 96,4 paıyzdy quraıdy.
«Bir oqýlyqtyń basylyp shyǵýyna úsh sarapshy qatysady: ǵalym, ádisker jáne bilim berý uıymynyń muǵalimi. Bıyl sheteldik mamandardy tartý arqyly avtorlar men sarapshylardy biliktiligin arttyrý bastaldy», dedi A. Sárinjipov.
