Bilim mınıstri JOO-lardy jabý quqyǵyn alǵysy keledi

NUR-SULTAN. QazAqparat - QR Bilim jáne ǵylym mınıstrligine joǵary oqý oryndary lıtsenzııalaryn qaıtaryp alý jáne jabý quqyǵy berilýi qajet. Bul týraly búgin atalǵan vedomostvonyń basshysy Ashat Aımaǵambetov aıtty, dep habarlaıdy QazAqparat tilshisi.

«Búginde sheshimdi sot qabyldaıdy. Al biz memlekettik organ retinde lıtsenzııa bergennen keıin ókiletti organ retinde atalǵan lıtsenzııany qaıtaryp alý, aıyrý quqyǵymyz bolýy qajet. Bul norma taıaý arada beriledi dep úmittenemin», - dedi mınıstr Májilistiń jalpy otyrysynan keıin BAQ ókilderine bergen suhbatynda.

Onyń atap ótýinshe, mundaı norma qazirgi ýaqytta Májiliste talqylanyp jatqan zań jobasynda kórinis tapqan.

«Májiliste ákimshilik kodekske ózgerister talqylanyp jatyr. Bul norma qabyldanady dep úmittenemin. Atalǵan normanyń qabyldanýy Bilim jáne ǵylym mınıstrligine JOO-lar biliktilik talabyna saı bolmaǵan jaǵdaıda jedel ári tıimdi áreket etýine múmkindik beredi», - dedi ol.

Ashat Aımaǵambetovtiń dereginshe, búginde Qazaqstanda joǵary oqý oryndarynyń sany óte kóp.

«Bizde joǵary oqý oryndary óte kóp. Eger olar talapqa saı bolmasa, onda biz olardy jabamyz. Qazirgi ýaqytta stýdentterdiń basqa joǵary oqý oryndaryna aýysýyn aýyrpalyqsyz júrgizý múmkindikterin qarastyryp jatyrmyz. Sebebi munan stýdentter zardap shekpeýi qajet»,- dedi mınıstr.