Bilim mınıstri UBT-ǵa qatysty tym asyǵystaý sheshim qabyldap otyr - senator
ASTANA. 26 sáýir. QazAqparat - Bilim jáne ǵylym mınıstri UBT-ǵa qatysty tym asyǵystaý sheshim qabyldap otyr.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Murat Baqtııaruly osylaı másele kóterdi.
«Jaqynda Bilim jáne ǵylym mınıstrligi kásiptik orta oqý oryndaryn bitirýshiler joǵary oqý oryndaryna túsý úshin orta mektep baǵdarlamasy negizinde test tapsyrý kerek degen sheshim qabyldady. Bizdińshe bul tym asyǵys qabyldanǵan sheshim bolǵan sııaqty. Óıtkeni, orta mektep pen kásiptik bilim beretin oqý oryndaryna memlekettik oqý standarttary men baǵdarlamarynda úlken aıyrmashylyqtar bar. Jýyrda aımaqtarda bolyp, jurtshylyqpen, ásirese, jastarmen kezdesýler kezinde, kolledj túlekteri men olardyń ata-analary tarapynan keshendi testileýge baılanysty úlken alandaýshylyqtar aıtyldy», - deıdi senator.
Onyń aıtýynsha, orta mekteptiń tolyq baǵdarlamasy boıynsha 10-11 synypta, ıaǵnı eki oqý jylynda oqıtyn pán sabaqtaryn 9-ynshy synyptan keıin oqýǵa túsken kolledj oqýshylary qysqartylǵan túrde, 1 jyl kóleminde ǵana oqıdy.
«Endi kelip, kásiptik orta oqý oryndarynda ótilmegen, oqytylmaǵan, túsindirilmegen pán taqyryptary boıynsha test suraqtaryna olar qalaı jaýap beredi? Al elimiz boıynsha 570-teı kolledjdi bıyl júz myńdaı túlek bitiredi dep kútilýde. Kásiptik orta oqý oryndary túlekteriniń de basym bóligi joǵary oqý oryndaryna túsip, joǵary bilimdi mamandyq alǵysy keletini anyq. Sondyqtan da arnaıy kásibı bilim alǵan mamandarymyzdy qaıtadan orta bilim negizinde jasalǵan keshendik test tapsyrtýymyzdy jónsiz dep sanaımyz», - deıdi M. Baqtııaruly.
Osyǵan oraı, depýtat asyǵystyqqa barmaýdy, negizsiz tájirıbe jasamaý kerektigin alǵa tartady.
