Bilim mınıstri synyp jetekshileri men psıxologtardy qaıta daıarlaýdyń sebebin túsindirdi
NUR-SULTAN. QazAqparat - QR Bilim jáne ǵylym mınıstri Kúlásh Shámshıdınova qaıta daıarlaý kýrstarynyń paıdasy týraly aıtty, dep xabarlaıdy QazAqparat tilshisi.
«Bárimiz jaqsy bilemiz, jalpy mekteptegi bilimniń sapasy muǵalimge baılanysty. Sol sebepti eń birinshi muǵalimderdiń kásiptik deńgeıin kóterýge baǵyttalǵan jumystar júrgiziletin bolady. Aldaǵy úsh jyldyń ishinde 144 myń muǵalim qaıta daıarlaý kýrstarynan ótedi. 82 myń synyp jetekshileri men psıxolgtar da ótetin bolady. Búginde ustazǵa da, ata-anaǵa da, balaǵa da psıxologtyń kómegi óte qajet. Sondyqtan bıyldan bastap biz psıxologtar men klas jetekshilerin qaıta daıarlaý kýrstarynan ótkizemiz. Sebebi mektep pen ata-ananyń arasyndaǵy eń birinshi dáneker, eń birinshi baılanystyrýshy ol - klas jetekshisi», - dedi K.Shámshıdınova Úkimet úıinde ótken baspasóz máslıxatynda.
Mınıstrdiń aıtýynsha, qaıta daıarlaý kýrstarynan kolledj qyzmetkerleri de ótedi. Olardyń sany 15 myńnan asady. Budan bólek, joǵary oqý oryndarynyń 2,5 myń oqytýshysy kásibı biliktiligin kóteretin bolady.
«Jalpy, biz ustazdarǵa ádistemelik kómek te kórsetýimiz kerek. Osyǵan baılanysty ádistemelik keshen - www.smk.edu.kz jumys istep tur. Onda 100 myńnan astam materıal bar. Jańa oqý jylynyń qarsańynda qazaq pen orys tiline qosymsha aǵylshyn tilindegi bólimi de ashylatyn bolady», - dep atap kórsetti K.Shámshıdınova.
Aıta keteıik, búgingi brıfıngte mınıstr bilim qyzmetkerleriniń jalaqysyn kóterý sharalary týraly aıtty. Atalǵan tapsyrmany QR Tuńǵysh Prezıdenti - Elbasy Nursultan Nazarbaev bergen bolatyn. Oǵan sáıkes, jalaqysy tómen bıýdjettik sala qyzmetkerleriniń jalaqysy 30 kóterilýi kerek. Búginde arnaıy tarıftik koeffıtsent bekitildi.
Budan bólek, Kúlásh Shámshıdınova jalaqynyń qalaı artatynyn naqty mysalmen kórsetti.
