Bilim mınıstri pedagogty qyzmetine tán emes jumysqa tartýǵa múmkindik beretin normany joıýǵa ýáde berdi
Aıta keterligi, búgin QR Parlamenti Májilisiniń jalpy otyrysynda «Pedagog mártebesi týraly» zań jobasy birinshi oqylymda talqylanyp jatyr. Talqylaý barysynda Májilis depýtaty zań jobasyndaǵy basty kemshilikti atady.
«Bul qoǵamǵa qajetti tamasha zań jobasy. Nur Otan partııasynyń saılaýaldy ýádesin oryndaýǵa múmkindik berip te otyrǵan zań. Biraq myna jerde mynadaı qyzyq bolyp tur. 6-baptyń 2-tarmaǵy 1-tarmaqshasynda bylaı deıdi: »Pedagogty onyń kásiptik qyzmetterine baılanysty emes jumys túrlerine tartýǵa jol berilmeıdi«, dep jazylǵan. Al zań jobasynyń 15-baby 7-tarmaqshasynda: «Qoǵamnyń áleýmettik, mádenı jáne ekonomıkalyq damýyna járdemdesýge mindetti» deıdi. Qoǵamnyń áleýmettik-ekonomıkalyq damýyna járdemdesý menińshe muǵalimniń qyzmetine kirmeıdi. Túlki bulań bolyp ketken joq pa?», - dep surady depýtat Bekbolat Tileýhan mınıstrden.
Osy oraıda sózge aralasqan Májilis spıkeri Nurlan Nyǵmatýlın «Aýrý qalsa da, ádet qalmaıtyndyǵyn» aıtyp kúldi.
«Shyn máninde bul tarapta biz kelisemiz, qaýip bar. Osyndaı redaktsııada bergennen keıin shyn máninde basqasha túsinedi. Bizdiń áriptesterimizdi jumysqa qaıtadan tartýǵa osy norma múmkindik berýi yqtımal. Bul kemshilikti moıyndaımyz. Jumys tártibinde bul másele jumys tobynda da qarastyryldy. 2-oqylymǵa deıin sizdiń usynysyńyzdy qabyldaımyz», - dedi Ashat Aımaǵambetov.
Bul rette Nurlan Nyǵmatýlın zańdy Parlamentke ákelmeı turyp túzetý qajettigin qatań eskertti.
«Parlamentke alyp kelgende ony nege engizbeısizder. Rasynda da osy eki normanyń maǵynasy bir-birine qarama-qarsy kelip turǵany kórinip tur ǵoı. Bir jaǵynan pedagogty basqa jumysqa tartýǵa bolmaıdy deımiz. Al ekinshi jaǵynan qoǵamdyq jumystarǵa kómektesý kerek deımiz», - dedi Májilis spıkeri.
