Bilim mınıstri pánderdi qazaq jáne aǵylshyn tilderinde oqytatyn jańa mektepti ashty (FOTO)
ASTANA. QazAqparat - Búgin Astanada daryndy balalarǵa arnalǵan №81 jańa «Astana English School» mektebi ashyldy. 1200 balaǵa arnalǵan mektep oqýshylardy arnaıy irikteý arqyly ǵana qabyldap jatyr. Qazaq jáne keıbir pánderdi aǵylshyn tilinde úıretetin mekteptiń ashylýyna Bilim jáne ǵylym mınıstri Asyljan Sárinjipov te qatysty.
«Búgin biz jańa oqý jylyn jańa mektepte bastap otyrmyz. Biz úshin úlken mereke, úlken qýanysh. Sondyqtan, shyn júrekten barshańyzdy quttyqtaımyn! Jalpy, jyl saıyn Qazaqstanda 150-den astam jańa mektep ashylyp otyrady. Degenmen, búgin alǵashqy oqýshylaryn qabyldaǵan bul mekteptiń deńgeıi men dárejesi joǵary bolmaq. Sebebi, mektep keıbir pánderin aǵylshyn tilinde úıretedi. Bul - qazirgi zamannyń talaby»,-deıdi óz quttyqtaýynda A.Sárinjipov.
Sonymen qatar, búgin barsha mektepterde alǵashqy sabaq týǵan jer týraly bolatynyn aıta kele, mınıstr 1-synyp oqýshylaryna Memleket basshysynyń syılyǵy - «Meniń Otanym - Qazaqstan!» atty kitapty tabys etti. «Búgin búkil Qazaqstan boıynsha mektepterdegi alǵashqy sabaq «Meniń Otanym - Qazaqstan» degen pánnen bastalady. Óıtkeni, eń basty qundylyǵymyz - turaqtylyq pen kelisim. Memleket basshysy bıyl 1-synypqa baratyn búldirshinderge erekshe syı jasady. Bıyl Qazaqstan boıynsha 330 myńnan asa bala 1-synypqa bardy»,-dep atap ótti A.Sárinjipov.
