Bilim mınıstri orys tildi depýtattardy qazaq tilin jedeldetip úıretetin topqa qatysýǵa shaqyrdy
Talqylaý barysynda senator Sergeı Ershov birqatar áriptesterimen birge memlekettik tildi úırenip júrgenin, alaıda ol baǵdarlamany qarjylandyrý bıylǵy jyl basynan beri toqtatylǵanyn aıtty. «Qazir Parlamentte de, memlekettik organdarda da qazaq tilin meńgerýge qatysty oqytylyp jatqan joq. Biz osyǵan baılanysty barlyq mınıstrlikterge habarlastyq. Alaıda, naqty jaýap alǵanymyz joq. Konstıtýtsııada Úkimet elimizdiń azamattarynyń barlyǵyna, onyń ishinde memelkettik qyzmetkerlerge memlekettik tildi erkin meńgerýi úshin barlyq jaǵdaıdy jasaıdy dep kórsetilgen. Osyǵan qatysty biz memlekettik til jónindegi baǵdarlamany toqtatpaýdy, qaıta ony jańǵyrtýdy suraımyz», dedi senator S.Ershov.
Óz kezeginde Mádenıet jáne sport mınıstri Arystanbek Muhamedıuly byltyr qarjylyq jaǵdaıǵa baılanysty birqatar baǵdarlamalar qysqartylǵanyn, degenmen, tutastaı alǵanda qazaq tiline qatysty máseleler atqarylyp jatqanyn aıtty. «Biz bıýdjetti aldaǵy bekitý barysynda osyndaı olqylyqtardy joıýǵa tyrysamyz dep oılaımyn», dedi A. Muhamedıuly.
Al Bilim jáne ǵylym mınıstri Erlan Saǵadıev memlekettik tilge oqytýǵa qatysty ádisnamanyń áli kúnge nashar deńgeıde qalyp otyrǵanyna toqtaldy. «Biz qazaq tiline oqytý ádisin túbegeıli ózgertetin bolamyz. Orys tilinde qazaq tilinen sabaq beretin muǵalimder qaýymymen kúni keshe kezdestik. Olardyń jáne basqa da til mamandarynyń usynystaryn eskere kele, aǵymdaǵy jyldyń jeltoqsan aıyna deıin biz qajetti ádisnamalardy daıyndap shyǵyp, qazaq tiline oqytatyn mektepterge jáne jalpy halyq úshin ony engizýdi qarastyramyz. Jedel oqytý ádisteri ǵylymı negizderge súıenedi, onda barlyq zamanaýı tehnologııalar qoldanylady. Biz Májilistiń orys tildi depýtattaryn aǵymdaǵy jeltoqsan aıynda ashylatyn memlekettik tilge jedel oqytý tobyna qatysýǵa shaqyrtý joldadyq. Sentorlardy da memlekettik tilge jedel oqytatyn topqa qatysý úshin jazylýǵa shaqyramyz», dedi E. Saǵadıev.
