Bilim mınıstri oqýlyqtardy ázirleý jumystaryn júıelendirý máselesi boıynsha respýblıkalyq keńes ótkizdi - Almaty
ASTANA. Qazannyń 25-i. QazAqparat - Qazaqstan Respýblıkasynyń Bilim jáne ǵylym mınıstri Baqytjan Jumaǵulov oqýlyqtardy ázirleý, saraptaý jáne basyp shyǵarý jónindegi jumystardy júıelendirý máselesi boıynsha Respýblıkalyq keńes ótkizdi. Búgin, qazannyń 25-inde ótken keńestiń jumysyna 50-den astam baspalardyń basshylary, oqýlyqtardyń jáne oqý-ádistemelik keshenderdiń 540 avtorlary, oqý ádebıetterine saraptama jasaıtyn mamandar, elimizdiń barlyq óńirlerinen kelgen ádiskerler men pedagogtar qatysty, dep habarlady Bilim jáne ǵylym mınıstrliginiń baspasóz qyzmetinen.
Birneshe jyl qatarynan otandyq oqýlyqtardyń sapasy synǵa alynyp kele jatqany belgili. Jekelegen basylymdarda stılıstıkalyq jáne orfografııalyq qateler kezdesip qalady. Olardyń mazmuny ǵana emes, polıgrafııalyq jaǵynan oryndalýyna da ókpe-naz aıtylýda. Avtorlar men baspagerler arasynda shyǵarmashylyq jáne iskerlik qarym-qatynastar ornatylmaǵan, oqýlyqtardy saraptamadan ótkizý ýaqyt talabyna jaýap bermeıdi.
Keńeste oqýlyqtardyń jáne oqý-ádistemelik keshenderdiń qurylymdyq taqyryptarynyń mazmunyna basa nazar aýdaryldy. Oqý basylymdaryn baǵalaýdyń dástúrli krıterııleri saraptaýǵa alynyp, olar naryqtyq naqty jaǵdaıǵa qaraı jan-jaqty taldaýdan ótetin bolady. Baspagerler oqýlyqtardyń mazmuny men polıgrafııalyq bezendirýi jónindegi sanıtarlyq-gıgıenalyq talaptarǵa qatysty pikir-oılarymen bólisti. Sondaı-aq elektrondyq bilim berý resýrstarynyń bolashaǵy jáne olardy keshendi saraptamadan ótkizý týraly da sóz boldy. Oqýlyqtardyń sapasyn saraptamadan ótkizý jóninde halyqaralyq saraptama júıesin qurýdy usyndy.
Ózekti máseleler boıynsha keńinen pikir almasyldy, oǵan Reseı Federatsııasynan kelgen baspagerler men sarapshylar, atap aıtqanda Máskeýdiń «Prosveşenıe», «Drofa», «Mnemozına» jáne basqa da baspalardyń ókilderi belsene qatysty.
Elimizdiń bilim vedomstvasynyń basshysy ulttyq oqýlyq kitaptaryn basyp shyǵarýdy odan ári damytý jóninde ózderiniń kózqarastarymen bóliskisi kelgenderdiń bárin de muqııat tyńdap, taldaýdyń baıypty qorytyndysyn shyǵardy. Ol oń nátıje retinde balama oqýlyqtar jasaý úshin básekeli orta qalyptasqanyn atap ótti. Onyń pikiri boıynsha alty myńnan astam oqýlyqtar men oqý-ádistemelik keshenderdiń ishinde jaqsy baǵa alǵan materıaldar az emes. Olar oqýshylardyń óskeleń oı-órisin eskere otyryp, túsinikti tilmen jazylǵan, jaqsy bezendirilgen. Bir sózben aıtqanda, otandyq oqýlyqtardy jasaýshylar men onyń avtorlary baspagerlermen birge shyǵarmashylyq izdeniste ekeni baıqalady. Biraq ta jahandaný dáýiri jańa talaptar qoıýda. Sondyqtan da qazirgi zamanda baǵa jetpes kapıtal - bilim ekeni sózsiz, al ony jaqsy oqýlyqtar men kitaptarsyz kóz aldyńa elestetýdiń ózi qıyn. Soǵan baılanysty qysqa merzimde oqýlyqtar basyp shyǵarýdy damytý úshin onyń pármendi quqylyq bazasyn jasaý qajet. Sapasyz oqýlyqtardyń úlgileri olardyń mazmunyn jarııaly túrde taldaý úshin Bilim jáne ǵylym mınıstrliginiń veb-saıtyna ornalastyrylatyn bolady. Ony jasaýshylardyń, avtorlardyń, sarapshylardyń, baspagerlerdiń, polıgrafısterdiń, bir-birimen qarym-qatynasyn joǵary deńgeıge kótergen jón. Bul oraıda talapty kúsheıte otyryp, olardyń tolyqqandy jumys isteýi úshin qajetti jaǵdaılardy jasaý kerek. Oqýlyqtardy jasaýǵa qatysatyn mamandardy materıaldyq jaǵynan yntalandyrý júıesin qaıtadan qarastyrǵan jón, - dedi mınıstr. Sondaı-aq, ol ondaǵan kókeıtesti suraqtarǵa jaýap berdi.
