Bilim mınıstri mektep basshylaryn taǵaıyndaý men olardyń jalaqysyn arttyrý jaıynda aıtty
«Úzilisti qajet etpeı, tórt jarym saǵat boıy áńgimelestik. Áriptesterim kókeılerinde júrgen saýaldaryn qoıyp, máselelerin ortaǵa saldy jáne ıdeıalarymen bólisti. Kezdesýge qatysýshylar orta bilim berýdi damytý boıynsha óz usynystaryn aıtty. Ádiskerlerdiń rólin arttyrý, rotatsııa ınstıtýtyn engizý, bilim berý uıymdarynyń basshylaryna qoıylatyn talaptardy kúsheıtý, olardy taǵaıyndaý jáne attestattaý tártibin ózgertý qajettiligi týraly sóz qozǵaldy. Ustazdar «bilikti pedagogtar basshylyq laýazymdarǵa umtylýǵa qulyqty emes» deıdi. Óıtkeni dırektorlardyń aılyǵy ustazdardyń eńbekaqysynan áldeqaıda tómen. Degenmen, júkteletin mindet kóp, artylatyn jaýapkershilik joǵary», - dep jazdy mınıstr áleýmettik jelidegi paraqshasynda.
Osyǵan baılanysty A. Aımaǵambetov mektep basshylaryn taǵaıyndaý jáne olardyń jalaqysyn arttyrý boıynsha engiziletin ózgerister týraly aıtyp berdi.
«Aldaǵy ýaqytta osy jańashyldyqtar jaıynda tolyǵyraq jazatyn bolamyn. Kezdesý barysynda pedagogtardy attestattaý, saladaǵy tsıfrlandyrý, pedagogıkalyq etıka normalaryn saqtaý, bilim berý baǵdarlamalary men oqýlyqtardyń mazmunyn jaqsartý, qashyqtan oqytýdy uıymdastyrý máseleleri, «Altyn belgige» úmitkerlerge qoıylatyn talaptardy kúsheıtý jáne taǵy basqa ózekti máseleler kóterildi», - dedi mınıstr.
Onyń aıtýynsha, jıynǵa qatysýshylar pedagog mártebesi artyp, jalaqynyń aıtarlyqtaı kóterilgenin alǵa tartty.
«Basqa da ózekti máselelerdi birge talqyladyq. Olardyń kópshiligi boıynsha tipti zańnamalyq deńgeıde naqty sheshimder qabyldanǵan. Bul máseleler týraly da kelesi jazbalarymda tolyǵyraq aıtyp beremin. Kezdesýge qatysqan áriptesterime aıtylǵan usynystary men qoıylǵan suraqtaryna alǵys aıtamyn», - dedi A. Aımaǵambetov.
