Bilim mınıstri kolledjderdi senimgerlikke berýdi keńeıtý úshin ne qajet ekenin aıtty
NUR-SULTAN. QazAqparat - Kolledjderdi senimgerlikke berýdiń aýqymyn keńeıtý úshin kásiporyndar men mekemelerdi yntalandyrý komponentin anyqtaý qajet. Bul týraly búgin Úkimet otyrysynda QR Bilim jáne ǵylym mınıstri Kúlásh Shámshıdınova aıtty, dep habarlaıdy QazAqparat tilshisi.
"Senimgerlikke berýdiń aýqymyn keńeıtý úshin kásiporyndar men mekemelerdi yntalandyrý komponentin anyqtaýdy usynamyz. Senimgerlik basqarýǵa ekonomıkanyń ár salalaryndaǵy 150-den astam óndiris lıderleri, tehnıkalyq, tehnologııalyq baǵyttaǵy joǵary oqý oryndary, úzdik kolledjder qatysýǵa ynta bildirip otyr. Bul oqý josparlaryn eńbek naryǵynyń talaptaryna sáıkestendirýge, jańa tehnologııalar negizinde jabdyqtalǵan óndiriste stýdentterdiń praktıkasyn uıymdastyrýǵa múmkindik beredi. Qaı zamanda da yntymaqtastyq, seriktestik birlik pen berekege aparatyn jol ekeni bárimizge belgili", - dedi ol.
Mınıstr senimgerlik basqarýdyń yntalandyrý komponentiniń mólsherin 19,8 aılyq eseptik kórsetkish deńgeıinde anyqtaýdy usyndy. Osy rette kadr daıarlaý kúrdeliligine baılanysty qosymsha koeffıtsent qarastyrylatynyn aıtty.
"Búginde Pavlodar, Almaty oblystarynda 5 kolledjdi kásiporyndar senimgerlik basqarýǵa alǵan. Solardyń ishinde «Agrodamý» JShS tájirıbesin atap ótýge bolady. Ózderińizge belgili APEC PETROTECHNIC kolledji Atyraý oblysyndaǵy munaı-gaz salasyndaǵy 2 kolledjdi senimgerlik basqarýǵa alýǵa nıet bildirip otyr. Bul oqý orny NCER, OPITO, IIW, Kembrıdj ýnıversıtetiniń halyqaralyq standarttarymen jumys isteıdi", - dedi mınıstr.
K.Shámshıdınovanyń aıtýynsha, Teńizshevroıl, "SCC", "Adjıp", FIRCROFT, Halliburton sııaqty kompanııalar atalǵan kolledjge úlken senim bildirip, óz oqý ortalyqtaryn japty. Osy kolledjge óz qyzmetkerlerin biliktiligin arttyrý jáne qaıta daıarlaý úshin jiberip otyrady. APEC PETROTECHNIC ózine senimdi basqarýǵa alǵan oqý oryndaryna munaı-gaz salasyndaǵy oqytýdyń halyqaralyq standarttaryna sáıkes úzdik tájirıbesin engizýdi qamtamasyz etedi.
"Sonymen qatar senimgerlikke berý «Ýnıversıtet-kolledj-ónerkásip» sııaqty úsh jaqty yntymaqtastyqty qalyptastyrady. Bul óz kezeginde úzdiksiz bilim berý júıesin damytýǵa, resýrstardy shoǵyrlandyrýǵa múmkindik beredi", - dedi ol.
