Bilim mınıstri eń úzdik ǵylymı zertteý jumystary úshin elimizdiń bir top ǵalymyn marapattady
ASTANA. Jeltoqsannyń 14-i. QazAqparat /Gúlmıra Álıakparova/ - Búgin QR Bilim jáne ǵylym mınıstri Janseıit Túımebaev jaratylystaný, gýmanıtarlyq jáne pedagogıkalyq ǵylymdar salasyndaǵy eń úzdik zertteýleri úshin elimizdiń bir top ǵalymyna ataýly syılyqtardy tabys etti,
dep habarlaıdy QazAqparat.
Baıqaýǵa barlyǵy 127 ǵylymı jumys usynyldy, biraq olardyń arasynan, ǵylymı tereń mazmunymen,teorııalyq jáne praktıkalyq turǵydaǵy mańyzdylyǵymen erekshelengen tek 12-si ǵana tańdap alynyp, jeńimpaz dep tanyldy.
J.Túımebaev ǵalymdardy quttyqtaı kele: «Bul dástúrli baıqaýda jeńimpaz ataný, ǵylymı elıta men shyǵarmashylyq zııaly qaýym úshin mańyzy erekshe, sebebi ol Qazaqstannyń asa tanymal ǵalymdary men qoǵam qaıratkerleriniń attarymen atalady», - dep atap ótti.
Eń úzdik ǵylymı jumystardyń ıelerine - Jaratylystaný ǵylymdary salasyndaǵy úzdik ǵylymı zertteýler úshin K.Sátbaev atyndaǵy; Gýmanıtarlyq ǵylymdar salasyndaǵy úzdik ǵylymı jetistikteri úshin Sh.Ýálıhanov atyndaǵy; Pedagogıka salasyndaǵy úzdik ǵylymı zertteýleri úshin Y.Altynsarın atyndaǵy; Túrkologııa salasyndaǵy asa zor jetistikteri úshin Kúltegin atyndaǵy; Jaratylystaný ǵylymdary salasyndaǵy jas ǵalymdardyń úzdik jumystary úshin D.Qonaev atyndaǵy jáne Gýmanıtarlyq ǵylymdar salasyndaǵy jas ǵalymdardyń úzdik jumystary úshin M.Áýezov atyndaǵy syılyqtar tabys etildi.
Olardyń arasynda Ál-Farabı atyndaǵy Qazaq Ulttyq ýnıversıtetiniń mádenı antropologııa kafedrasynyń professory Tursyn Ǵabıtov, L.Gýmılev atyndaǵy Eýrazııa Ulttyq ýnıversıteti «Eýrazııa» ǵylymı ortalyǵynyń bas ǵylymı qyzmetkeri Qoıshyǵara Salǵarauly, M.Lomonosov atyndaǵy Máskeý memlekettik ýnıversıteti qazaqstandyq fılıalynyń matematıka jáne ınformatıka kafedrasynyń dotsenti Qýanysh Bekmaǵanbetov, Qazaq memlekettik qyzdar pedagogıkalyq ýnıversıtetiniń «Jalpy pedagogıka» kafedrasynyń qyzmetkeri Nazgúl Anarbek jáne basqalar bar.
