Bilim mınıstri elorda men Aqmola oblysynyń mektepterin aralady
«Aqmola oblysyndaǵy Taıtóbe aýylynyń 700-ge jýyq bala oqıtyn mektebinde boldym. Ondaǵy oqý kabınetterin aralap, materıaldyq-tehnıkalyq bazasymen tanystym. Ókinishke qaraı, mektep kitaphanasy men kitaphana qorynyń jumysy tıisti deńgeıde emes ekenin baıqadym. Balalardyń oqýǵa súıispenshiligin oıatý úshin mektep kitaphanalary oqýshylardyń suranysyna ıe kórkem ádebıettermen qamtamasyz etilýi kerek. Sol úshin «Oqýǵa qushtar mektep» jobasynyń aıasynda qajetti jumys júrgizilip jatyr. Oqý jylynyń basynan beri elimizdegi kitaphana qory 2 mıllıon kórkem ádebıetpen tolyqty. Bul baǵyttaǵy jumysta eshkim artta qalmaýy kerek. Sondyqtan barlyq mektep dırektorlary men bilim basqarmalarynyń basshylary osyǵan erekshe nazar aýdarýy qajet», - dep jazdy Bilim mınıstri Facebook jelisinde.
Sondaı-aq A. Aımaǵambetov mektep ashanasyndaǵy baǵa men assortıment máselesi de týyndaǵanyn jazdy. Osyǵan baılanysty mektep basshylylyǵyna jáne bilim basqarmasyna birqatar mindetter qoıyldy, olardyń oryndalýyn mınıstrlik qadaǵalaıdy.
«Árıne, keıbir máselelerdi memlekettik deńgeıde sheshetin bolamyz. Pedagogıkalyq qurammen áńgimelesip, ustazdarǵa rıza boldym. Muǵalimder magıstratýraǵa túsýdi, taǵylymdamadan ótýdi josparlap júr. Al aǵylshyn tili muǵalimderiniń biri «Bolashaq» baǵdarlamasy boıynsha Londondaǵy Koroldik kolledjinde oqyp kelgen. Áriptestermen jaqyn arada jańartylatyn bilim berý baǵdarlamalaryn talqyladyq. Muǵalimdermen jıi kezdesip turamyn jáne áńgime barysynda bul taqyryp kún tártibindegi basty máselelerdiń birine aınalady», - deıdi vedomstvo basshysy.
Oǵan qosa, mınıstr Tselınograd aýdanyndaǵy jekemenshik «Dara» mektebine barǵan. Onda 700 bala oqıdy jáne 80 muǵalim sabaq beredi.
«Olardyń jalaqy mólsheri boıynsha qarastyratyn máseleler bar, óıtkeni memleket memlekettik tapsyrys somasyn kóbeıtse, sáıkesinshe, bul ósim jalaqynyń ósýine de áser etýi kerek. Qarjy ortalyǵyna jáne Bıýdjettik josparlaý departamentine máseleni zerttep, usynystar engizý tapsyryldy. Mektep oqýshylarymen áńgimeleskendi jaqsy kóremin jáne osy saparda da balalarmen sóılestik. Aıtpaqshy, olar oflaın oqý jáne muǵalimdermen, synyptastarymen shynaıy ómirdegi qarym-qatynas unataıtynyn aıtty.
Sonymen qatar jańa mektep qurylysynyń barysymen tanystym. Ol úsh aýysymdy oqytý máselesin sheshýge kómektesedi. Qosshy qalasyndaǵy mektep 1200 orynǵa shaqtalǵan jáne qazir onda ishki árleý jumystary júrgizilip jatyr. Oblystyq qurylys basqarmasy nysandy belgilengen merzimde tapsyrmaǵan, qurylys jumystary aıtarlyqtaı keshiktirilip jatyr. Osy máselelerdiń barlyǵy meniń baqylaýymda bolady», - deıdi Ashat Aımaǵambetov.
