Bilim mınıstri: Aýtıst balalar men olardyń ata-analaryna qoldaý artady

NUR-SULTAN. QazAqparat – Elimizde taǵy 40-qa jýyq psıhologııalyq-medıtsınalyq-pedagogıkalyq keńes (PMPK) ashylady. Bul týraly QR Bilim jáne ǵylym mınıstri Ashat Aımaǵambetov Telegram kanalynda jazdy, dep habarlaıdy QazAqparat.

Mınıstr qazirgi normatıv boıynsha ár 60 myń balaǵa bireý - 87 psıhologııalyq-medıtsınalyq-pedagogıkalyq keńes jumys istep turǵanyn aıtady. Olar aýtızm spektriniń buzylýy bar (ASB) balalardy anyqtaýǵa jáne olardyń ata-analaryna keńes berýge kómektesedi. Endi olardyń qatary keńeıtilmek. Jańa normatıv boıynsha 50 myń balaǵa bir PMPK bolady dep josparlanǵan. Bul - taǵy 40-qa jýyǵy ashylady degen sóz.

Sonymen qatar, «Elimizde 211 psıhologııalyq-pedagogıkalyq túzetý kabıneti jáne 14 ońaltý ortalyǵy jumys isteıdi. Biz aýtızmi bar balalarǵa arnalǵan otandyq arnaıy damý baǵdarlamalaryn ázirledik. Búgingi tańda PPTK baǵdarlamasy boıynsha ASB bar 2 myńǵa jýyq bala kómek alyp jatyr», - dedi mınıstr.

Erekshe qajettilikteri bar balalardy oqytý úshin bilim berý baǵdarlamalarynyń jáne balalardyń oqý jetistikterin baǵalaý júıesiniń tıimdiligin qamtamasyz etý sharalary qabyldanǵan.

«400-den astam arnaıy oqý baǵdarlamasy ázirlenip jatyr. Mektepterde pedagog-assıstent qyzmetin engizsek, endi mundaı mamandardy mektepke deıingi uıymdarǵa da engizýdi josparlap otyrmyz. Bizdiń tapsyrmamyz boıynsha barlyq pedagogıkalyq joǵary oqý ornynda ASB bar balalardy oqytý jáne tárbıeleý taqyryptaryn qamtıtyn ınklıýzıvti bilim berý modýlderi engizildi. Sonymen birge, olar ASB bar balalarmen jumys isteıtin pedagogterdiń biliktiligin arttyrý kýrstaryn ótkizedi. Bul baǵytta aldaǵy ýaqytta da jumystar jalǵasady», - dedi Ashat Aımaǵambetov.