Bilim mınıstri attestat tapsyrý sharasy qalaı ótetinin túsindirdi
NUR-SULTAN. QazAqparat – QR Bilim jáne ǵylam mınıstri Ashat Aımaǵambetov bıyl oqýshylarǵa attestat tapsyrý rásimi qalaı ótetinin aıtyp berdi, dep habarlaıdy QazAqparat tilshisi.
«Osyǵan deıin oqý jylynyń aıaqtalýyna oraı, 25 mamyrda dástúrli túrde sońǵy qońyraý soǵylyp keldi, ıaǵnı mektep bitiretin 9 jáne 11-synyp oqýshylary bar. Elimizde tórtinshi toqsan qashyqtan oqytý formatynda ótip jatyr jáne 25 mamyrda mektepte eshkim bolmaıdy. Dástúrli formatta mektepte qońyraý soǵylmaıdy. 25 mamyrda sońǵy qońyraýdy onlaın formatta ótkizýdi josparlap otyrmyz», - dedi A. Aımaǵambetov onlaın tártipte ótken baspasóz máslıhatynda.
Sonymen qatar mınıstr attestat tapsyrý sharalaryna qatysty toqtaldy.
«3-4 maýsymda 11 synyp úshin attestat tapsyrý ótkiziledi. Osy oraıda Densaýlyq saqtaý mınıstrligimen keńes júrgizdik. Qazirgi jaǵdaıǵa qaramastan, atalǵan merzimde 11 synypqa arnap attestatty saltanatty túrde tapsyrý rásimin ótkizýdi josparlyp otyrmyz. Sonymen birge, olar úshin sońǵy qońyraýdy uıymdastyramyz», - dep túsindirdi vedomstvo basshysy.
Onyń sózine qaraǵanda, atalǵan shara aıasynda birqatar shekteýler bolady.
«Sanıtarlyq talaptar qatań saqtalady. Balalardyń, pedagogtardyń qaýipsizdigine aıryqsha ekpin qoıamyz, medıtsınalyq masqa taǵý mindetti bolady. Bul shara aýlada, ıaǵnı ashyq keńistikte ótedi. Ár synyp óziniń sharasyn jekeleı uıymdastyrady. Araqashyqtyqty saqtaý úshin arnaıy belgiler qoıylady», - dedi mınıstr.
Budan buryn habarlanǵandaı, 11-synyp túlekterine attestat 3-4 maýsymda tapsyrylady.
