Bilim mınıstri Almatydaǵy UBT-nyń ótkizilý barysymen tanysty
ANA. 6 maýsym. QazAqparat - Ulttyq biryńǵaı testileýdiń ekinshi kúni, 5 maýsymda 25 760 mektep bitirýshi túlek elimizdiń óńirlerindegi 63 emtıhan qabyldaý qosynynda ulttyq testileý tapsyrdy.
Bilim jáne ǵylym mınıstri Baqytjan Jumaǵulov bul kúni Almaty qalasyndaǵy Ulttyq biryńǵaı testileýdiń ótkizilý barysymen tanysty.
Mınıstr jumys saparyn Qazaqtyń Abaı atyndaǵy ulttyq ýnıversıteti men Qazaq ulttyq agrarlyq ýnıversıtetinen bastady. Eń kóp túlek test tapsyryp jatqan iri ortalyqtar osy oqý oryndarynda ornalasqan, dep habarlady Bilim jáne ǵylym mınıstrliginiń baspasóz qyzmetinen.
Emtıhan bastalmas buryn mınıstr men mınıstrliktiń ókilderi, komıssııa tóraǵalary men test tapsyrý qosyndarynyń dırektorlary aýdıtorııalardy aralady. Mınıstr emtıhan tapsyrýǵa jınalǵan oqýshylarǵa tolqýlaryn basyp, eń basty emtıhandy sátti tapsyrýǵa tilek bildirdi.
Baqytjan Jumaǵulov sondaı-aq jeke joǵary oqý oryndarynyń biri -Almaty tehnologııalyq ýnıversıtetinde bolyp, ata-analarmen kezdesti, olardyń oı-pikirlerin tyńdady.
