Bilim mınıstri «Álippeni» oqytýdyń mán-jaıyn aıtty
ASTANA. QazAqparat - 0- synypta «Álippe», al 1- synypta «Ana tili» bolyp qalady. Bul týraly esepti kezdesýde QR Bilim jáne ǵylym mınıstri Erlan Saǵadıev málim etti, dep habarlaıdy QazAqparat.
«12 jyldyq oqytýǵa kóshýde «0+11» birinshi bóligi bolady, ony tolyǵymen iske asyrýdy 2019 jylǵa belgilep otyrmyz. 0-synyp ne úshin qajet? Balalardyń júz paıyzy mektepke kelgende daıyn bolýy kerek. Qazirgi kezde órenderdiń 85 paıyzy mektep tabaldyryǵyn attaǵanda áripter men sandardy tanıdy, oqı alady, al qalǵan 15 paıyzy az bolsa da muǵalimderge salmaq túsiredi. 0-synypty mektepte jáne balabaqshada ótýge bolady»,-dep toqtaldy mınıstr.
Osy oraıda Saǵadıev 0-synyptyń máni biryńǵaı baǵdarlama men oqýlyqty engizýge negizdelgenin jetkizdi.
«Qazir bári «Álippe» qaıda ketti dep surap jatyr. «Álippe» 0- synypqa bazalyq oqýlyq bolyp barady. Bıyl onyń baǵdarlamasy daıyn, qanatqaqty joba retinde balabaqsha men mektepte engize bastaımyz. Onda 1- synyptyń oqýlyǵy «Saýat ashý» eki jaqqa bólinip, 0- synypta «Álippe» bolady, al 1- synypta «Ana tili» bolyp qalady. Bizde myńnan astam balabaqsha men mektep qanatqaqty jobaǵa jazylǵan. Bul jumystar jaqsy nátıje kórsetse, kelesi jáne 2019 jyly barlyǵyna taratamyz»,-dedi vedomstvo basshysy.
